काठमाडौँ । राष्ट्रिय परीक्षा बोर्डले माध्यमिक शिक्षा परीक्षा (एसइई) को नतिजा यही वैशाख २९ गतेभित्र सार्वजनिक गर्ने गरी अन्तिम तयारी पूरा गरेको छ । सरकारले यस वर्षदेखि परीक्षा सकिएको एक महिनाभित्रै नतिजा सार्वजनिक गर्ने घोषणा गरेअनुसार बोर्डले तीव्र गतिमा काम गरिरहेको हो ।

विगतमा नतिजा प्रकाशनका लागि करिब तीन महिना लाग्ने गरेकोमा प्रधानमन्त्री बालेन शाह नेतृत्वको सरकारले पहिलोपटक एक महिनाभित्रै नतिजा ल्याउन लागेको हो ।

बोर्डका अनुसार तोकिएको समयमै नतिजा सार्वजनिक गर्ने गरी सम्पूर्ण जनशक्ति परिचालन गरिएको छ । बाँकी प्राविधिक काम समयमै सकिए त्योभन्दा केही दिन अगाडि नै पनि नतिजा सार्वजनिक हुन सक्ने बोर्डका अधिकारीहरुकोभ भनाइ छ ।

चैत १५ देखि सुरु भई २९ गते सकिएको यस वर्षको एसइई नतिजा यति छिटो सार्वजनिक हुनुमा बोर्डले अपनाएको विकेन्द्रीकृत प्रणाली मुख्य कारण मानिएको छ ।

सम्पूर्ण प्रक्रिया पूरा भएपछि बोर्डको बैठक बसेर नतिजा सार्वजनिक गर्ने औपचारिक निर्णय गरिनेछ । यसअघिका वर्षहरूमा भने एसइईको नतिजा जेठ अन्तिम वा असार पहिलो साता मात्र सार्वजनिक हुने गरेको थियो ।