नेपाली कांग्रेस संसदीय दलका प्रमुख सचेतक श्याम घिमिरेले गृहमन्त्री रमेश लेखकको राजीनामा मागेर राष्ट्रिय स्वतन्त्र पार्टी (रास्वपा) फसेको टिप्पणी गरेका छन् । आज (बिहीबार) संसद् भवन परिसरमा सञ्चारकर्मीहरुसँग संक्षिप्त कुराकानी गर्दै उनले गृहमन्त्रीको राजीनामा माग्दै बेल घेराउमा पुगेको रास्वपालाई फर्किन गाह्रो भइरहेको बताएका हुन् । उनले रास्वपा पनि एक राजनीतिक शक्ति रहेको बताउँदै वार्ताको माध्यमबाट समस्याको समाधान खोजिने बताए । भिजिट भिसा प्रकरण छानविनका लागि समिति गठन हुनुपर्ने र गृहमन्त्रीले राजीनामा दिएर छानविनका लागि मार्ग प्रशस्त गर्नुपर्ने मागसहित रास्वपा र राष्ट्रिय प्रजातन्त्र पार्टी (राप्रपा) को माग रहेको छ । रास्वपाले सदनमा अवरुद्ध गरिराखेको छ भने राप्रपाले बैठक नै बहिस्कार गर्दै आएको छ ।

‘गृहमन्त्रालयका कर्मचारी पनि मुछिएका होलान् । अहिले अख्तियारले अनु्सन्धान सुरु गरेको छ । अहिलेसम्म कसैमाथि अभियोजन भएको छैन । मुद्दा अभियोजन जुन बेला होला, त्यही बेला हामी सबैलाई थाहा होला कि को–को यसमा संलग्न छन् भन्ने कुरा मुद्दा अख्तियारले अभियोजन गरेपछि थाहा हुन्छ । अहिले त के भएको हो भनेर अनुसन्धानकै प्रक्रियामा छ । कर्मचारी पनि दोषी भन्न मिल्दैन । अहिले नै मानव बेचविखन भयो, गृहमन्त्रीले मान्छे बेच्यो भनेर बेतु्कको कुरा गर्ने बेअर्थ छ । यो कुरामा उहाँहरु फस्नुभयो । उहाँहरुले अनावश्यक माग राखेर एउटा हदसम्म पुग्नुभयो । बेल घेराउमा पुग्नुभयो, पुगेपछि उहाँहरुलाई पनि फिर्ता हुन गाह्रो भएको होला । राजनीतिक शक्ति हो, त्योसँग पनि वार्ता गरेर सहमतिमा पुर्याउँछौं,’– उनले भने ।

साथै, जान चाहनेहरुलाई पैसा लिएर पठाइएको कुरालाई मानव तस्करी भन्न नमिल्ने उनको तर्क छ । ‘जो मान्छे जान चाहन्थ्यो, जान चाहनेसँग पैसा लिएर पठाइयो भन्ने कुरा हो । यो मानव बेचिखन भनेको के हो ? तपाईँलाई लगेर मैले कतै बेचेँ, तपाईँलाई कहीँ पुर्याएर मैले लाभ लिएँ भने भने पो त्यो मानव बेचबिखन हुन्छ त । जेलाई पनि मान बेचविखन भन्दिने ?’ प्रश्न गर्दै उनले भने ।