राष्ट्रिय प्रजातन्त्र पार्टी (राप्रपा) का प्रवक्ता एवं संसदीय दलका प्रमुख सचेतक ज्ञानबहादुर शाहीले भिजिट भिसा प्रकरणमा तत्कालीन गृहमन्त्री कृष्णप्रसाद सिटौलादेखि वर्तमान गृहमन्त्री रमेश लेखकसम्म छानविन हुनुपर्ने बताएका छन् । आज (मंगलबार) संसद् भवन परिसरमा सञ्चारकर्मीहरुसँग संक्षिप्त कुराकानी गर्दै उनले भिजिट भिसा प्रकरणमा भएको मानव तस्करी जघन्य अपराध रहेको र यसमा कसैलाई पनि उन्मुक्ति दिन नहुने बताएका हुन् ।

‘अहिलेका गृहमन्त्रीको मात्र कुरा होइन यो । लामो समयदेखि यो यिनीहरुको अपराध, कुकर्म भइराखेको छ । हरेक गृहमन्त्रीहरुलाई छानविनमा ल्याउनुपर्छ । यो आजको मात्रै मुद्दा होइन । २०६४ सालदेखिको मुद्दा हो । पहिलो गृहमन्त्री कृष्णप्रसाद सिटौलादेखि लिएर अहिलेका गृहमन्त्री रमेश लेखकसम्मलाई छानविनको दायरामा ल्याउनुपर्छ भनेर हामीले माग राखेका छौं,’– उनले भने ।

यो देशमा रोजगारी पनि नदिने, रोजगारीका लागि विदेश जानेलाई पनि बेचिदिने यो भन्दा ठूलो अपराध हुन नसक्ने उनले बताए । ‘यो आजबाट भएको होइन, झण्डै १८ वर्षदेखि यो बिजनेश, यो अपराध भइराखेको छ । यो अपराधको छानविन गरौं भनेर हामीले निरन्तर माग राखिराखेका छौं । त्यही मागअन्तर्गत संसद्मा गतिरोध हुँदाहुँदै, संसद् चल्दाचल्दै संसद्मा विरोधका वाबजुद पनि संसद् चलेपछि राष्ट्रिय प्रजातन्त्र पार्टीले बहिस्कार गरेको थियो,’– उनले भने ।

आज संसद् रोकेर सभामुख देवराज घिमिरेले छलफलमा राखेको र भोलि पनि छलफलको कुरा अगाडि बढ्ने र भिजिट भिसा प्रकरणमा कसैलाई उन्मुक्ति दिन नहुने बताए । उक्त प्रकरण जघन्य अपराध रहेको बताउँदै उनले कसैले पनि गिभ एण्ड टेकको नीतिअनुसार अगाडि बढ्न नहुने बताए ।