प्रधानमन्त्री केपी शर्मा ओलीले बोलाएको प्रमुख तीन दलका शीर्ष नेताहरुको बैठक सकिएको छ । सिंहदरबारमा बसेको कांग्रेस, एमाले र माओवादी केन्द्रका शीर्ष नेताहरुको बैठकमा सदनको अवरोध हटाउने विषयमा छलफल भएको थियो ।

तर, सदनको अवरोध हटाउने विषयमा भने सहमति नभएको बैठकमा सहभागी माओवादी केन्द्रका प्रमुख सचेतक हितराज पाण्डेले जानकारी दिए । उनले भने,‘प्रधानमन्त्रीले बोलाएको बैठकमा हामी सहभागी भयौं । संसदको गतिरोध हल गर्नेबारे छलफल भयो । यस्तै, प्रतिगामीहरुको गतिविधिको विषयमा कुराकानी भयो । यी विषयमा छलफल भए । तर, ठोस निर्णय । सदन अवरोध हल गर्ने विषयमा सहमति भएन ।’

प्रधानमन्त्री ओलीले सदन अवरोध गर्नु राम्रो नहुने भन्दै खोल्नको लागि आग्रह गरेको पनि पाण्डेले जनाए । प्रधानमन्त्री ओलीले गृहमन्त्री लेखकको राजीनामा नआउने अडान सुनाएका थिए । उनले भने,‘प्रधानमन्त्रीले राजीनामा होईन सदन खोलेर अघि बढौं भन्नुभयो । हामीले राजीनामाको विषयवस्तु यथावत छ भन्यौं । यो त सुशासनमा केन्द्रित विषय हो नि ।’

भिजिट भिसा प्रकरणमा गडबड भएको पाण्डेको भनाई छ । उनले भने,‘माननीय गृहमन्त्रीले यो समस्या हल गर्नको लागि राम्रोसँग अनुसन्धान गनकोलागि मार्गप्रशस्त गर्नुपर्छ भनेका छौं । त्यो भनेको त राजीनामा नै भइहाल्छ । तर, प्रधानमन्त्रीले यो त कर्मचारीको कुरा हो भन्नुभयो ।’