राष्ट्रिय प्रजातन्त्र पार्टी (राप्रपा) का नेता एवं प्रतिनिधिसभा सदस्य दीपकबहादुर सिंहले मोहम्मद अफताब आलमलाई ६ महिनाको लागि गृहमन्त्री बनाइदिन प्रधानमन्त्री केपी शर्मा ओलीलाई सुझाव दिएका छन् । नेपाली रेडियो नेटवर्कको नेपाली बहसमा पत्रकार ऋषि धमलासँग संवाद गर्दै नेता सिंहले प्रधानमन्त्री ओलीले विगतमा आलमको बारेमो टिप्पणी गर्र्दै ‘जिउँदो मान्छेलाई इटाभट्टामा हालेर जलाउने आलमलाई हामीले थुन्यौं’ भनेको स्मरण गराए । अहिले तिनै आलमलाई अदालतले सफाइ दिइसकेको भन्दै उनले अब गृहमन्त्री बनाउँदा उपयुक्त हुने भन्दै व्यङ्ग्य गरेका हुन् ।

‘प्रधानमन्त्री केपी ओली शर्माले आफू सरकारमा हुँदाखेरी जिउँदै इटाभट्टामा मान्छे जलाएर मार्नेलाई मैले थुनामा राखेको भनी अहिले विभिन्न मिडियामा आइराखेको छ । अब त अदालतले सफाइ दिइसकेको छ अफ्ताबजीलाई । अब ६ महिनाको लागि गृहमन्त्रीमा अफ्ताबजीलाई नै बनाउन बाँकी छ । त्यो पनि देखाइदिनुस् न । साढे २ वर्षपछि हामी चुनाव लडेर त्यो बेलामा बहुमत ल्याएर सरकार बनाउँला,’– उनले भने ।

आलमविरुद्ध गत २०६४ संविधान सभाको निर्वाचनको बेला २३ जनालाई इँटाभट्टामा जिउँदै जलाएर मारेको आरोप थियो । २०७६ कात्तिक २९ मा जिल्ला अदालतले आलमलाई पुर्पक्षका लागि कारागार पठाउने आदेश दिएकोमा न्यायाधीश मातृका प्रसाद आचार्यको एकल इजलासले प्रतिवादी आलमलगायतलाई जन्मकैदको सजाय सुनाएको थियो । व्यक्ति हत्या प्रकरणमा जिल्ल अदालतबाट दोषी ठहर भएका आलमलाई गत जेठ १४ गते उच्च अदालत जनकपुर वीरगञ्ज इललासले सफाइ दिएको थियो ।

नेता सिंहले अहिले देशका अराजकता बढ्दै गएको भन्दै अब यही व्यवस्था कायम रहेको खण्डमा देश डुब्ने सुनिश्चित रहेको बताए । ‘आज जुन तरिकाबाट यो देश ड्राइभ भइराखेको छ, त्यो राष्ट्र डुब्ने सुनिश्चित भइसकेको छ । यो अब कसले बचाउने भन्नुस् त ?’ प्रश्न गर्दै उनले भने ।