नेकपा (माओवादी केन्द्र) का अध्यक्ष तथा पूर्व प्रधानमन्त्री पुष्पकमल दाहाल ‘प्रचण्ड’ ले वर्तमान सरकार गलत बाटोमा हिँडेको आरोप लगाएका छन् । पार्टीको जागरण अभियानअन्तर्गत बागलुङ बजारमा आज (शुक्रबार) आयोजित कार्यक्रमलाई सम्बोधन गर्दै उनले यस्तो बताएका हुन् ।

उनले वर्तमान सरकार भ्रष्टाचारीहरूको संरक्षण र दलालहरूको हित गर्नेतिर केन्द्रित भएको गम्भीर आरोप लगाए । उनले सरकारलाई तत्काल सच्चिन भनेका छन् । नत्र आन्दोलनको आँधीबहेरी सिर्जना गरेर सरकारलाई जनताले विस्थापित गर्ने पनि दाहालको चेतावनी छ ।

उनले एयरपोर्टमा उच्चस्तरीय सेटिङमा भैरहेको भिजिट भिसाको नाममा दैनिक ५० लाख असुली गरिएको विषयमा पनि सरकारको आलोचना गरे । ‘अहिले म सुन्दैछु विमानस्थलमा लाखौँ–करोडौँको घोटाला हुने गरेको छ । म प्रधानमन्त्री र नारायणकाजी गृहमन्त्री भएको बेलामा हामीले एकपछि अर्को नीतिगत निर्णय गर्दै टाइट गर्दै लगेका थियौँ। अहिले एउटै रुटबाट सरकारको हातमा ५०औँ लाख गइरहेको छ भ्रष्टाचारको रूपमा । यो स्थिति भएपछि कसरी आर्थिक स्थितिमा सुधार हुन्छ ?’