नेकपा (एमाले)का नेता महेश बस्नेतले सरकारका दुई मन्त्रीमाथि गम्भीर आर्थिक अनियमितताको आरोप लगाएपछि शिक्षामन्त्री महावीर पुनले ती आरोपको व्यंग्यात्मक जवाफ दिएका छन्।

मंगलबार बस्नेतले ऊर्जामन्त्री कुलमान घिसिङ र अर्थमन्त्री रामेश्वर खनालमाथि ५ अर्ब रुपैयाँको सेटिङ गरेको दाबी गर्दै सामाजिक सञ्जालमा पोस्ट गरेका थिए।
उक्त पोस्टलाई नै आधार बनाएर मन्त्री पुनले एमाले र बस्नेतमाथि तिखो टिप्पणी गरेका छन्।

पुनले बस्नेतको अभिव्यक्तिलाई “हाँसउठ्दो” भन्दै प्रतिक्रिया दिएका छन्।
उनले एमाले नेतृत्व सत्तामा हुँदा देशको कायापलट गरेझैँ प्रस्तुत गर्ने तर अहिले अरूलाई अर्ती दिने प्रवृत्ति आफूलाई अचम्म लाग्ने बताएका छन्।

पुनले लेखेका छन्—
“के के न आफूहरूले साह्रै राम्रो काम गरेर नेपाललाई स्वर्ग जस्तै बनाएको र नेपाललाई अति सम्पन्न तथा भ्रष्टाचारमुक्त बनाए जस्तो कुरा गर्छ बा यो भाइले। म त हाँसेरै मर्छु कि क्या हो।”