रौतहट — रौतहट सदरमुकाम गौरमा शनिबार राति सुटकेसभित्र भेटिएको शवको पहिचान खुलेको छ। मृतक माधव नारायण नगरपालिका–२ महादेवपट्टीकी २६ वर्षीया रुवीकुमारी साह रहेको जिल्ला प्रहरी कार्यालय रौतहटका डीएसपी राजु कार्कीले जानकारी दिएका छन्।

गौर–सिरसिया सडकखण्डस्थित दिव्यज्योति स्कुल नजिकै स्थानीयले राति करिब ९ बजे शंकास्पद सुटकेस देखेपछि प्रहरीलाई खबर गरेका थिए। बम हुनसक्ने आशंकामा प्रहरीले रातभर घटनास्थल सुरक्षित राखी आइतबार बिहान मात्र बम डिस्फोजल टोलीसहित सुटकेस खोलेको थियो।

खोल्दा भित्र शव फेला परेको थियो। प्रारम्भिक अनुमान अनुसार घाँटी कसेर हत्या गरिएको हुनसक्ने प्रहरीले जनाएको छ।

शव पोस्टमार्टमका लागि जिल्ला अस्पताल गौरमा राखिएको छ।

स्थानीयका अनुसार रुवीकुमारीको विवाह भारतको मुजफ्फरपुरमा भए पनि पछिल्लो समय उनी माइती घरमै बस्दै आएकी थिइन्। पतिसँगको सम्बन्धबारे हालसम्म स्पष्ट जानकारी प्राप्त भएको छैन।

प्रहरीले परिवारलाई अनुसन्धानका लागि बोलाएको छ र घटनाबारे थप अनुसन्धान भइरहेको जनाएको छ।