नेकपा (एकीकृत समाजवादी) का उपाध्यक्ष जगन्नाथ खतिवडाले वर्तमान सरकारको औचित्य समाप्त भइसकेको बताएका छन् । आज (बिहीबार) रिपोर्टर्स क्लब नेपालमा आयोजित साक्षत्कार कार्यक्रमलाई सम्बोधन गर्दै उनले जनता समाजवादी पार्टी (जसपा) नेपालले समर्थन फिर्ता लिएपछि राष्ट्रिय सभामा यो सरकार बहुमतसमेत गुमाएको र यसको मूल एजेण्डा संविधान संशोधन पूर्णतः असफल भएको बताएका हुन् । नेता खतिवडाले एकीकृत समाजवादी वर्तमान सरकार ढाल्ने कुरामा दृढ भएर लाग्ने पनि बताए ।

‘यो सरकारको औचित्य लगभग समाप्त भइसकेको छ । समयक्रमले यो सरकारलाई परिवर्तन गर्न अनिवार्य छ भन्ने देखाइसकेको छ । तर, कांग्रेस र एमालेको स्वार्थको घडा नफुटेसम्म परिवर्तन हुने लक्षण नदेखिएकोले नेकपा (एकीकृत समाजवादी) चाहिँ यो सरकारको तत्काल विघटन हुनुपर्ने, नयाँ सरकार बनाउनुपर्ने, बन्नुपर्ने यो कुरामा दृढ भएर लाग्ने छ, हाम्रो दृष्टिकोण त्यतातिर छ,’– उनले भने ।

नेता खतिवडाले. प्रधानमन्त्री केपी शर्मा ओली नेतृत्वको वर्तमान सरकार गठन हुँदाको जग नै राम्रो नरहेको बताए । उनले वर्तमान सरकारले गरेको क्रियाकलाप र गतिविधिहरुले जनतालाई विश्वास भन्दा अनास्था फैलाइरहेको बताए । भ्रष्टाचार र भ्रष्टाचारीहरुलाई संरक्षण गर्नको लागि वर्तमान सरकार टिकिरहेको उनको टिप्पणी छ । कांग्रेस र एमाले दुईवटा पार्टी मिलेर सरकारमा बहुमत पुग्यो भनेर घमण्ड गरिरहेको उनले बताए । सरकारमा भएकै कारण कांग्रेस–एमाले दिनप्रतिदिन अलोकप्रिय भइरहेको उनले बताए ।