परराष्ट्र मन्त्रालयले पाकिस्तानमा रहेका नेपालीहरुको सुरक्षा तथा हित सुनिश्चित गर्नेतर्फ सरकार पूर्णरुपमा सचेत रहेको बताएको छ । आज (शुक्रबार) एक विज्ञप्ति जारी गर्दै मन्त्रालयले पाकिस्तानमा रहेका नेपालीहरु निरन्तर रुपमा दूतावासको सम्पर्कमा रहेको बताउको हो ।

परराष्ट्रले तत्कालै थप कुनै सहयोग आवश्यक परेमा नेपाली विद्यार्थी तथा उनीहरुका अभिभावक, आफन्त र त्यहाँ रहेका नेपालीले इस्लामावादस्थित नेपाली राजदूतावासमा सम्पर्क गर्नसमेत भनेको छ ।

पछिल्लो समय भारत र पाकिस्तानबीच द्वन्द्व सुरु भएको छ । केही समयअघि जम्मू कश्मिरको पहलगाममा आतङ्ककारी हमलाबाट एक नेपालीसहित कम्तिमा पनि २६ जनाको मृत्यु भएको थियो । भारतले उक्त हमला पाकिस्तानले गराएको दाबी गर्दै जवाफी कारबाही गरेको थियो ।

भारत र पाकिस्तानबीच द्वन्द्व बढिरहँदा ती देशमा रहेका नेपाली नागरिकहरुको जिउ धनको सुरक्षा र उनीहरुको उद्दारको सम्बन्धमा प्रतिनिधि सभामा सांसदहरुले सरकारको ध्यानाकार्षण गराउँदै आएका छन् । विभिन्न सरोकारवाला निकायहरुले प्रश्न उठाएपछि सरकारले पाकिस्तानमा रहेका नेपालीहरुको अवस्थाबारे बोलेको हो ।