नेकपा (माओवादी केन्द्र) का अध्यक्ष पुष्पकमल दाहाल ‘प्रचण्ड’ ले देश माओवादीमय भएको बताएका छन् । आज (आइतबार) बाँकेको राप्ती सोनारीस्थित फत्तेपुरमा आयोजित पार्टीको जनसभालाई सम्बोधन गर्दै उनले देश प्रचण्डमय भइसकेको बताएका हुन् । माओवादीको पक्षमा आएको उभार जोगाउन सकिन्छ कि सकिँदैन भन्नेमात्रै आफूहरुलाई डर रहेको प्रचण्डले बताए ।

‘माओवादी फेरि एकचोटी जनतासँग जोडिइसकेको छ, वर्गसँग जोडिइसकेको छ । करोडौं जनता फेरि माओवादीसँग । जनताको उत्साह, कार्यकर्ताको उत्साह माअ‍ोवादीमय भएको देखेँ मैले । मलाई अलिअलि डर लाग्छ कहिलेकाँही, प्रचण्डमयजस्तो भइरहेको छ अहिले देशैभरी । यसलाई थाम्न सकिन्छ कि सकिँदैन, त्यो जिम्मा पूरा गर्न सकिन्छ कि सकिँदैन ? निकै ठूलो बोझ, जनताले फेरि भारी बोकाएको हामीलाई महशुस भएको छ,’– उनले भने ।

देशका सबै उत्पीडित वर्गको हक अधिकार, उनीहरुको आत्मसम्मान र पहिचानको निम्ति आफूहरुले लडाईँ लडेर आएको पनि प्रचण्डले बताए । उनले माओवादीले सही विचारको आधारमा जनतासँग घनिष्ट सम्बन्ध बनाएर लडाइँ जितेको बताए । सघीय लोकतान्त्रिक गणतन्त्र माओवादीको सपना रहेको र त्यो ठाउँमा देश पुगिसकेको उनले बताए । प्रचण्डले संघीयता उल्ट्याउने, गणतन्त्रमाथि धावा बोल्ने, जनताले पाएको अधिकार खोस्ने स्याल हुइँया मच्चाएको बताए । उनीहरुको उक्त दुष्साहस कहिले पनि पूरा नहुने प्रचण्डले बताए ।