नेकपा माओवादी केन्द्रका सांसद माधव सापकोटाले सरकारले आफ्नै प्रतिबद्धता अनुसार काम गर्न नसकेको बताएका छन् ।

सुशासन दिने, सार्वजनिक सेवा प्रवाहमा चुस्तता ल्याउने, संविधान कार्यान्वयन गर्ने लगायतका प्रतिबद्धता जनाएर संसद्का दुई ठूला दल नेपाली कांग्रेस र नेकपा एमालेले सरकार बनाएको उनले स्मरण गरे । तर, त्यसअनुसार काम गर्न नसकेको भनेर उनले आलोचना गरे ।

त्यसक्रममा माओवादी सांसद सापकोटाले सरकारले सुरु देखि नै नेपाल विद्युत प्राधिकरणका तत्कालीन कार्यकारी निर्देशक कुलमान घिसिङलाई दुःख दिएको बताए । ‘आएका दिनदेखि कुलमानजीलाई झम्टनुभयो । हुँदाहुँदा त्यसको पराकाष्ठा त अहिले आफ्नै मन्त्रीलाई समेत बर्खास्त गर्नुभयो’, सांसद सापकोटाले भने ।

सरकारको यस्तो व्यवहार बोल्न नपाइने निरंकुश प्रवृति रहेको भनेर आलोचना गरे । ‘बोल्न नपाइने निरकुशता जे छ तपाईंहरू (सत्तारुढ दलहरू)सँग । तपाईंहरू एक पछि अर्को मनलाग्दी गर्ने, कानुन मिच्ने, संविधान मिच्ने, जथाभावी गर्ने यो सबै कुराको हामीले ठीक छ भनिदिनुपर्ने ?’ सापकोटाको प्रश्न छ ।

माओवादी सांसद सापकोटाले यी प्रश्न गरिरहँदा नेपाली कांग्रेसका सांसद पूर्णबहादुर तामाङ (कान्छाराम)ले टेबुल ठोकिरहेका थिए । सांसद् तामाङ हालै बर्खास्तीमा परेका निवर्तमान ऊर्जा जलस्रोत तथा सिंचाइ राज्यमन्त्री हुन् ।

माओवादी सांसद सापकोटाले सरकारले आफैंले गरेको प्रतिबद्धता अनुसार काम गरे प्रश्न गर्नेहरू स्वतः कम भएर जाने सुझाए । ‘तपाईंहरु खुरु खुरु संविधान संशोधन गर्ने, राष्ट्रलाई अरु डेलिभरी दिन्छौं भनेर आउनुभएको हो नि !’ सापकोटाले अगाडि प्रश्न गरे, ‘भटाभट हाम्रो मुखमा बिर्को लाग्नेगरी काम गर्नुस् न के ले रोकेको छ तपाईंहरूलाई ?’

प्रतिपक्षको काम नै गलत हुन लागे खबरदारी गर्ने रहेको उनले बताए । प्रतिपक्षले आफ्नो भूमिका निर्वाह गर्दा अनावश्यक प्रश्न गरेर पन्छिने प्रयास नगर्न उनले आग्रह गरे ।

माओवादी सांसद सापकोटा भन्दा अगाडि बोलेका एमालेका सांसद पदम गिरीले शिक्षकको आन्दोलन उक्साउन प्रतिपक्षीले भूमिका खेलेको आरोप लगाएका थिए ।

जवाफमा माओवादी सांसद सापकोटाले शिक्षकले विगतमा भएका सहमति कार्यान्वयन र शिक्षा ऐन मागेर आन्दोलन गरेको बताए । यो विषयलाई प्रतिपक्षसँग जोडेर अनावश्यक आरोप लगाउनु भन्दा समस्या समाधान गर्नेतिर ख्याल गर्न उनको सुझाव छ ।