नेपाली कांग्रेसका पूर्व महामन्त्री तथा पूर्व गृहमन्त्री कृष्णप्रसाद सिटौलाले पूर्वराजा ज्ञानेन्द्र शाहलाई चुप लागेर बस्न चेतावनी दिएका छन् । नेपाल विद्यार्थी संघ केन्द्रीय समितिले आज (बिहीबार) काठमाडौंमा आयोजना गरेको ‘संघीय लोकतान्त्रिक गणतन्त्रको सार्थकता र स्थायित्वको अपरिहार्यता’ विषयक विचार गोष्ठी कार्यक्रमलाई सम्बोधन गर्दै सिटौलाले पूर्वराजा ज्ञानेन्द्रलाई यस्तो चेतावनी दिएका छन् ।

उनले नेपाल र नेपाली जनताको साँच्चै माया लागेको छ भने राजनीतिमा आउनपनि ज्ञानेन्द्रलाई सुझाव दिए । उनले भने,‘तपाईं विद्यार्थी र युवा जमातलाई साक्षी राखेर भन्न चाहन्छु, देशभरिका युवालाई साक्षी राखेर भन्न चाहन्छु कि राजा ज्ञानेन्द्र तिमी चुप लागेर बस । त्यसैमा तिम्रो भलाई र कल्याण छ । मन छ भने राजनीतिमा आउ । भारतमा पनि राजा नै राजा थिए, ती सबै राजा अहिले राजनीतिमा आएका छन् । तिमी पनि राजनीतिमा आए हुन्छ । साँच्चै जनताको सेवा गर्न मन छ भने र जनताको माया छ भने उनले बचेखुचेको सम्पत्ति दिउन् न त जनतालाई ।’

उनले शाहलाई सम्पत्ति राष्ट्रियकरण गर्न आँट छ भन्दै प्रश्न सोधे । वीरेन्द्र शाहको परिवारको सम्पत्ति पनि नेपाल ट्रष्टमा ऐन बनाएर ल्याईएको पनि उनले सुनाए ।