संघीय राजधानी काठमाडौंको तिनकुनेमा चैत्र १५ गते शुक्रबार आयोजित राजावादीहरुको प्रदर्शनमा हिंसा भड्काएको भन्दै प्रहरीको फरार सूचिमा रहेका दुर्गा प्रसाईं पक्राउ परेका छन् । घट्नास्थलबाटै प्रसाईंलाई पक्राउ गर्न नसकेको प्रहरी पछिल्लो दुई सातादेखि आलोचित बनेको थियो ।

राजावादीहरुको प्रदर्शनको लागि निर्मलनिवासको आर्शिवादमा जनकमाण्डर तोकिएका प्रसाईंले सभा सुरु हुनुअघि नै निषेधित क्षेत्र बलपूर्वक तोडेका थिए । उनकै उत्तेजक भाषणको कारण तिनकुनेमा वितण्डा मच्चिएको प्रहरीको निश्कर्ष छ । प्रसाईंले चैत्र १५ गतेयता लगातार भिडिओ पोष्ट गरेर आफू नेपालमै छु भनेर ढाँटेका थिए ।

तर, प्रहरी स्रोतले भने उनी भागेर भारत पुगेको आशंका गरेको थियो । उनलाई पक्राउ गर्न प्रहरीको विशेष टोली परिचालित थियो । हिजोमात्रै प्रसाईंले आफू नेपालमै रहेको र मानवअधिकारवादीहरुको संरक्षणमा प्रहरीसामू आत्मसमर्पण गर्न तयार रहेको सन्देश प्रवाह गरेका थिए ।

तर, प्रहरीले उनलाई आज भारतको आसामबाट पक्राउ गरेको उच्च स्रोतको दाबी छ । उनलाई आजै नेपाल ल्याईँदैछ । चैत्र १५ गते नै राप्रपाका वरिष्ठ उपाध्यक्ष रवीन्द्र मिश्र र महामन्त्री धवलशमशेर जबरा पक्राउ परिसकेका छन् । उनीहरुलाई म्याद थपेर प्रहरीले अनुसन्धान गरिरहेको छ ।