नेपाल बार एशोसिएशनको २७औँ केन्द्रीय कार्यसमितिका लागि भएको निर्वाचनको मतगणना जारी रहेको छ । बारको नयाँ कार्यसमितिका लागि गत शनिबार मतदान भएको थियो । अहिलेसम्म झापा, इलाम, विराटनगर, मोरङ, सुनसरी, धनकुटा, राजविराज, उदयपुर, पर्सा, हेटौडा, बागलुङ, सिराहा, सर्लाही, रौतहट, बारा, तनहुँ र स्याङ्जा, जनकपुर, कपिलवस्तु, नवलपरासी, बुटवल, रूपन्देही र पाल्पा, चितवन, दाङ देउखुरी, दाङ तुलसीपुर, जुम्ला, धनगढी, दिपायल, महेन्द्रनगर, डँडेलधुरा, नेपालगञ्ज, काठमाडौंलगातको मत मतगणना भएको छ ।

उक्त मत गणनामा अध्यक्षका प्रतिस्पर्धी बृहत् लोकतान्त्रिक, प्रगतिशली, पेसागत, राष्ट्रवादी एवं समावेशी कानुन व्यवसायी समूहबाट वरिष्ठ अधिवक्ता प्रा.डा.विजयप्रसाद मिश्रल ३ हजार ९ सय ६४ मत पाएका छन् भने व्यावसायिक कानुन व्यवसायी समूहका वरिष्ठ अधिवक्ता रमण श्रेष्ठले १ हजार ६ सय ७७ मत प्राप्त गरेका छन् । वरिष्ठ अधिवक्ताद्वय मिश्र र श्रेष्ठबीचको मतान्तर २ हजार २ सय ८७ (दोब्बरभन्दा बढी) रहेको छ ।

त्यस्तै, महासचिवतर्फ प्रतिस्पर्धी बृहत् लोकतान्त्रिक, प्रगतिशली, पेसागत, राष्ट्रवादी एवं समावेशी कानुन व्यवसायी समूहबाट र व्यावसायिक कानुन व्यवसायी समूहका उम्मेदवारबीच प्रतिस्पर्धा रहेको छ । बृहत् लोकतान्त्रिक समूहबाट महासचिवका उम्मेदवार केदार प्रसाद कोइरालाले ३ हजार ७ सय ३९ मत पाएका छन् । व्यावसायिक कानुन व्यवसायी समूहबाट महासचिवको उम्मेदवार रहेका यज्ञमणि न्यौपानेले भने १ हजार ५ सय ७१ मत पाएका छन् ।

बारको नयाँ कार्यसमिति चयन गर्न ९ हजार ९५७ मतदाता रहेकामा ८० प्रतिशत मत खसेको थियो । कुल २५ जना रहने कार्यसमितिका लागि ५७ जनाको उम्मेदवारी परेको थियो ।