प्रधानमन्त्री केपी शर्मा ओलीले आफू छिट्टै भारत भ्रमणमा जाने संकेत गरेका छन् । थाइल्याण्डको औपचारिक भ्रमण सकाएर आज स्वदेश फर्किएका प्रधानमन्त्री ओलीले त्रिभुवन अन्तर्राष्ट्रिय विमानस्थलमा यस्तो बताएका हुन् । सञ्चारकर्मीले सोधेको ‘भारत भ्रमण अब सम्भव होला ?’ भन्ने प्रश्नमा प्रधानमन्त्री ओलीले कतिपय कारणले नभ्याएर भ्रमण नभएको भन्दै असम्भव नभएको जवाफ फर्काए । उनले भने,‘सम्भव असम्भव पनि होला र ? भारत भ्रमण असम्भव कुरा थियो र ? कतिपय कारणले नभ्याएको स्थिति थियो ।ड

प्रधानमन्त्री ओलीले अहिले सगरमाथा सम्वादको तयारीको लागि व्यस्त भएको सुनाए । तर, भ्याउने अवस्था मिल्यो भने सगरमाथा सम्वादअघि पनि भारत भ्रमण हुनसक्ने प्रधानमन्त्री ओलीको भनाई छ । उनले भने,‘कहिले के काम परेको हुन्छ, कहिले के त्यही भएर मात्रै हो । बाहिर भनेजस्तो भारत भ्रमणमा कसैले काँडेतार लगाएको छ र ? त्यस्तो हुँदै होइन । त्यसलाई ठिकै ढंगले बुझ्दा हुन्छ। हामी अलिकति व्यस्तै छौं, सगरमाथा संवाद लगायतका विषयले । हामीले भ्याउँछौं भनेदेखि भने सगरमाथा सम्वाद अगाडि हुन पनि सक्छ ।’

आगामी जेठ २–४ सम्म सगरमाथा सम्वाद हुने तय छ । भारतीय प्रधानमन्त्री मोदीसँगको आफ्नो भेट फलदायी भएको पनि उनले सुनाए । उनले भने,‘यो भेटघाटबाट म फलदायी भेटघाट भयो र खुसी छु । उहाँको कुराकानीबाट उहाँ पनि खुुसी हुनुहुन्छ भन्ने मैले पाएको छु ।’