सूचना, सञ्चार तथा प्रविधिमन्त्री एवं नेपाल सरकारका प्रवक्ता पृथ्वीसुब्बा गुरुङले पूर्वराजा ज्ञानेन्द्रले आफ्नो हैसियत भुलेर हर्कत गरिरहेको टिप्पणी गरेका छन् । आज (शुक्रबार) मन्त्रिपरिषद्को निर्णय सार्वजनिक गरेपश्चात सञ्चारकर्मीहरुसँग संक्षिप्त कुराकानी गर्दै उनले फेरि सत्तामा फर्कन्छु भन्दै पूर्वराजा ज्ञानेन्द्रले हैसियत भुलेर हर्कत गरिरहेको बताएका हुन् । ‘म फेरि फर्कन्छु भनेर जुन खालको हर्कत भइरहेको छ, यो उसले आफ्नो हैसियत भुलेको हो,’– मन्त्री गुरुङले भने ।

साथै, आफ्नो परिवार, आफ्नो ज्यान, दरबार र राजतन्त्रको रक्षा गर्न नसक्ने राजसंस्थाले देशको रक्षा गर्न सक्छ भन्ने कुरामा विश्वास गर्न नसकिने उनले बताए । मन्त्री गुरुङले अब एउटा कूलमा जन्मिएकै कारण मुलुकको तीन करोड जनताको सबैभन्दा श्रेष्ठ ठहरिएर शासन गर्न नपाइने बताए । ‘राजावादी मच्चिँदै हिँड्दैमा राजा फर्किन्छजस्तो लाग्दैन,’– उनले भने ।