नेकपा (माओवादी केन्द्र) का अध्यक्ष एवं पूर्व प्रधानमन्त्री पुष्पकमल दाहाल ‘प्रचण्ड’ ले धेरै दिन टिक्लाजस्तो नलागेपनि आफ्नो तेस्रो प्रधानमन्त्रीत्व कार्यकाल १८ महिना टिकेको दाबी गरेका छन् । आज (बुधबार) प्रचण्डपथः सडक कि सत्ता विषयक कान्तिपुर कन्क्लेभमा प्रचण्डले आफू नेतृत्वको १८ महिने प्रधानमन्त्रीत्वको कार्याकाल सफल भएको दाबी गरेका हुन् ।

‘गएको १८ महिनामा राम्रो गर्छौं, नराम्रो गर्दैनौं भनेर मैले सुरु गरेको थिएँ । मैले प्रधानमन्त्रीको शपथ ग्रहण गर्दैगर्दा यो पटक मेरो लागि चुनौति पनि हो, अबसर पनि हो । त्यसकारण म राम्रो गर्ने प्रयास गर्छु, नराम्रो चाहीँ गर्दिनँ । यो सरकार कतिदिन टिक्छ मलाई थाहा छैन । हुनसक्छ एक दुई महिनामा जानसक्छ किनकी मेरो त ३२ सिट छ भन्ने मलाई थाहा थियो नि । जादु भनेपनि म्याजिक भनेपनि रियालिटी त त्यही हो मेरो । त्यसकारण धेरै दिन टिक्लाजस्तो मलाई लाग्दैन थियो । एक महिना भएपनि राम्रो गरेर छोड्छु, दुई महिना भएपनि राम्रो गरेर छोड्छु भनेकै थिएँ । १८ महिना गयो । ठूलो कुरा भयो । १८ महिना जानु ठूलो कुरा भयो र १८ महिना मूलभूत रुपमा सफलताको साथ गयो,’– उनले भने ।

साथै, अहिले सत्तारुढ दलका नेता र प्रधानमन्त्री जहाँ जाँदा पनि विरोध र कालो झण्डा प्रदर्शन भइरहेको उनले बताए । प्रचण्डले आफू जहाँ जाँदा पनि जनताको माया र सम्मान पाइरहेको बताए । जनताले प्रचण्डले साँच्चिकै परिवर्तन चाहेको थियो भन्ने कुरा बुझेको पनि उनको दाबी छ । ‘अहिले तपाईँ हेर्नुभयो भने दुई तिहाईवाला नेता साथीहरु जनताको बीचमा जाँदा कालो झण्डा, नाराबाजी सबै भएको छ । म गएको छु, बाढीपहिरो आयो, पीडित जनताको बीचमा गएँ । त्यहाँ जनताको निकै ठूलो माया र सम्मान मैले पाएँ । जनताले अहिले प्रचण्डले सच्याउन खोजेकै हो भन्ने बुझेका छन्,’– उनले भने ।

पूर्व प्रधानमन्त्री प्रचण्डले विगतमा केहीहदसम्म माओवादीहरु पनि बिग्रिएको स्वीकार गरे । उनले भेडा र सिंहको कथा सुनाउँदै आफूहरु पनि भेडाको हुलमा हिँड्दा त्यस्तै बन्ने लागेको बताए । अब माओवादी सच्चिने र भेडाहरुको भीडमा नमिसिने पनि उनले बताए । ‘हामी माओवादीहरु त्यस्तै (सिंहजस्तै) थियौं वास्तवमा । भेडासँग हिँदाहिँड्दा अलिअलि भ्याभ्या गर्न थालियो । अब नगर्ने विचार छ मेरो,’– उनले भने ।