नेपाली कांग्रेसक नेता डा. शेखर कोइरालाले संविधान संशोधन गर्ने हो भने सत्तारुढ दलले दुई तिहाइको दम्भ देखाउन नहुने बताएका छन् । शनिबार उदयपुरमा आयोजित कार्यक्रमलाई सम्बोधन गर्दै उनले संविधान संशोधनका लागि विपक्षी दलहरुसँग पनि सहकार्य गर्न जरुरी रहेको बताएका हुन् । एक्लै दुई तिहाइको बहुमतमा रहेकी बंगलादेशकी प्रधानमन्त्री शेख हसिनाको सन्दर्भ उल्लेख गर्दै उनले प्रधानमन्त्री केपी शर्मा ओली र सभापति शेरबहादुर देउवालाई चेतावनी दिए ।

‘अहिलेको सय दिनमा संविधान सुधारका कुनै पनि कुराहरु अगाडि बढ्न सकेको छैन । संविधानमा संशोधन गर्ने, सुधार गर्ने हो भने विपक्षी दलहरुसँग पनि हामीले सहकार्य गर्न जरुरी छ । हामीहरुले दम्भ देखाएर, दुई तिहाइ बहुमत छ भनेर मात्रै संविधान सुधार हुन सक्दैन । संविधान सुधारको सन्दर्भमा सबै राजनीतिक दलहरुसँग सहकार्य गरेर अगाडि बढ्नुबाहेक हामीसँग अर्को विकल्प हुन सक्दैन,’– डा. कोइरालाले भने ।

साथै, सरकार बनाउने बेलामा कांग्रेस–एमालेबीच भएको ७ बुँदे सम्झौता स्मरण गराउँदै उनले अब ती सम्झौता कार्यान्वयनको लेखाजोखा सुरु गर्न पनि नेता तथा कार्यकर्तालाई आग्रह गरे । सम्झौतामा उल्लेख रहेको संविधान संशोधनको विषय अहिलेसम्म पनि अगाडि बढ्न नसकेको भन्दै उनले असन्तुष्टि व्यक्त गरे ।

प्रधानमन्त्री ओलीले म भ्रष्टाचार गर्दिनँ, गर्न पनि दिन्नँ भनेपनि व्यवहारमा त्यो नदेखिएको उनले टिप्पणी गरे । एमालेको पार्टी कार्यालय बनाउन व्यवसायी मिनबहादुर गुरुङले दान दिएको १० रोपनी १४ आना जग्गातिर लक्षित गर्दै उनले सरकार भ्रष्टाचार नियन्त्रण गर्न असफल भएको बताए । उनले आफूलाई देश कतै असफल राष्ट्रतिर त जाँदैन ? भन्ने चिन्ता रहेको बताए । ‘चिन्ता लाग्छ कतै देश असफल राष्ट्रतिर त जाँदैन भनेर । हामीहरुले नै बनाएको हो यो सरकार । हामीहरुले बनाएको सरकारलाई, त्यो पनि दुईवटा ठूला दललाई कुनै किसिमको छुट अब हामीले दिन मिल्दैन । त्यो छुट नदिन गलत कुरालाई तिमीले गलत गरेका छौ भन्नुपर्यो,’– उनले भने ।