अर्थ मन्त्रालयले एक सय दिनमा सम्पादन गर्ने कामको कार्ययोजना तयार गरेको छ । मन्त्रालयका काम कारबाहीलाई चुस्त दुरुस्त बनाइ कार्यसम्पादन गर्न कार्ययोजना तयार गरिएको बताइएको छ ।

उपप्रधान तथा अर्थमन्त्री विष्णुप्रसाद पौडेलले मन्त्रालयको कार्यभार सम्हालेसँगै कार्ययोजना तयार पारेर काम सुरु गरिएको हो । कार्ययोजनामा मुलुकको समग्र अर्थतन्त्र सुधारको लागि उच्चस्तरीय आर्थिक सुधार सुझाव आयोग गठन गर्ने, दोस्रो वित्तीय क्षेत्र विकास रणनीति तयार गर्ने, राजस्व चुहावट नियन्त्रण गर्न केन्द्रीय द्रुत गस्ती टोली गठन गरी परिचालन गर्ने विषयलाई प्राथमिकतामा राखिइएको छ ।

कार्ययोजनामा आन्तरिक राजस्व परिचालन रणनीति २०८१ कार्यान्वयन सुरु गर्ने, भन्सार मूल्यांकनलाई कारोबार मूल्यमा आधारित बनाउन रणनीति तयार गरी लागू गर्ने, भन्सार महसुल नियमावाली २०८१ तर्जुमा गर्ने, गत आर्थिक वर्षमा विधि सम्मत रुपमा सिर्जित दायित्व एकिन गरी भुक्तानी गर्नेलगायतका विषयहरु पनि समेटिइएको छ ।