उपप्रधान एवम् गृहमन्त्री रवि लामिछानेले प्रधानमन्त्री पुष्पकमल दाहालसँग भेटवार्ता गरेका छन् । सिंहदरबारमा पुगेर गृहमन्त्री लामिछानेले प्रधानमन्त्री दाहालसँग भेटवार्ता गरेका हुन् । प्रधानमन्त्री दाहालले एमालेबाट सरकारमा सहभागी सबै मन्त्रीहरुलाई बर्खास्त गर्नेगरि तयारी गरेका छन् ।

दाहालले यस विषयको जानकारी राष्ट्रपति रामचन्द्र पौडेललाई दिइसकेका छन् । प्रधानमन्त्री दाहालले एमाले–कांग्रेसबीच नयाँ सरकार गठनबारे सहमति भएपनि तत्काल राजीनामा नदिने निर्णय लिएका छन् । उनले सदनमा विश्वासको मत लिने निर्णय गराएका छन् । यसले पनि एमाले नेतृत्व अहिले दबाबमा परेको छ ।

प्रधानमन्त्री दाहालले कांग्रेस सभापति शेरबहादुर देउवालाई नै प्रधानमन्त्री बन्नको लागि अफर गरेका छन् । देउवाले आफूले ओलीसँग सहमति गरिसकेकाले अहिले सहकार्य नहुने भन्दै सरी भनेको कुरा पनि बाहिरिएको छ । तर, राष्ट्रपति निवास शितलनिवासको भेटवार्तापछि प्रधानमन्त्री दाहाल कांग्रेससँग नै सहकर्या गर्नसकिने विश्वाससहित एक्सनमा उत्रिएका छन् ।

प्रधानमन्त्री प्रचण्ड र गृहमन्त्री लामिछानेबीच आगामी दिनमा कसरी अगाडि बढ्ने भन्ने सन्दर्भमा छलफल भएको बताइएको छ । राष्ट्रिय स्वतन्त्र पार्टीले कांग्रेस–एमाले नेतृत्वको सरकारमा सहभागी नहुने निर्णय गरिसकेको छ ।