काठमाडौं । चौधरी ग्रुपले उत्पादन गर्ने वाइवाइ चाउचाउको विक्री घटेको छ । पछिल्लो समयमा सामाजिक सञ्जालदेखि विभिन्न सञ्चारमाध्यममा प्रकाशित समाचारका कारण चाउचाउको बिक्री प्रभावित बनेको हो ।

त्रिवि क्रिकेट मैदान बाहिर पसल सञ्चालन गर्दै आएका नन्दु दाई (नन्दराम महर्जन) आजभोलि वाइवाइ चाउचाउको विक्री घटेको बताउँछन् । उनी भन्छन् ‘पहिले धेरै चाउचाउ बिक्री हुन्थ्यो तर आजभोलि बिक्रि नै हुन छोड्यो ।’

बिहीबार नेपाल र वेस्ट इण्डिजबीचको खेल भइरहेको बेलामा त्रिवि क्रिकेट मैदानभित्र प्रहरीले चाउचाउ बेच्न नै नदिएको गुनासो पनि उनले गरे ।

गएको सातामात्रै कम गुणस्तरका चाउचाउ बजारमा बिक्रीवितरण गरेको भेटिएपछि महानगरको कृषि तथा पशुपन्छी विभागले वाइवाइ चाउचाउलाई जरिवाना तिराएको थियो ।

साथै, महानगरले गरेको नमुना परीक्षणका क्रममा चाउचाउ खानयोग्य नभएको पाइएको थियो । त्यसपछि सामाजिक सञ्जालदेखि विभिन्न सञ्चारमाध्यममा वाइवाइ खान योग्य नभएको भन्दै चर्चा भइरहेको छ । यसको प्रभाव यतिबेला बजारमा पनि देखिएको हो ।