जनमत पार्टीका अध्यक्ष डा.सिके राउतले माथिको डिजाइनअनुसार नै रेशमलाल चौधरीलाई पक्राउ गरिएको आरोप लगाएका छन् । आज (बुधबार) अदालतको पत्रका आधारमा रेशमलाई पार्टी एकता घोषणा कार्यक्रमस्थलबाट पक्राउ गरिएको थियो ।

रेशमलाई सादा पोशाकका कर्मचारीले पक्राउ गरेसँगै आजको पार्टी एकता कार्यक्रम स्थगित भएको थियो । सर्वोच्चको मुद्दा तथा रिट महाशाखामा कार्यरत शाखा अधिकृत महिमानसिंह विष्टको हस्ताक्षरमा जारी भएको पत्रका आधारमा चौधरी पक्राउ गरेका थिए । उक्त पत्र आधिकारिक नरहेको बताउँदै सर्वोच्चले चौधरीलाई तत्काल रिहा गरिदिन अर्को पत्र लेखको थियो ।

सर्वोच्चले जारी गरेको पछिल्लो पत्रका आधारमा चौधरी जेलमुक्त भइसकेका छन् । रेशम छुटेसँगै जनमतका अध्यक्ष राउतले भने, ‘यो सामान्य पक्राउ हुँदै होइन । कतै अरु यस्तो त्रुटी देख्नुभएको छ सर्वोच्च अदालतबाट ? कर्मचारीलाई त मोहरा (गोटी) मात्रै बनाइएको विचरालाई । उहाँलाई मैले विचरामात्रै भन्न सक्छु । यो धेरै माथिबाट भएको हो ।’