पूर्व उपप्रधान एवम् गृहमन्त्री वामदेव गौतमले आजको दिनमा आफू र प्रधानमन्त्री केपी शर्मा ओलीबीचको सम्बन्ध शून्यमा रहेको बताएका छन् । उनले प्रधानमन्त्री ओलीसँग आफ्नो सम्बन्ध राम्रो पनि नभएको र नराम्रो पनि नभएको भन्दै त्यसलाई शून्यको सम्बन्धको संज्ञा दिए ।

प्राइम टिभीबाट प्रसारण भएको “जनता जान्न चाहन्छन्” कार्यक्रममा पत्रकार ऋषि धमलासँगको कुराकानीमा उनले यस्तो खुलासा गरेका हुन् । आफ्नो पहलमा एमाले र माओवादीबीच एकता भएर नेकपा बनेको स्मरण गर्दै गौतमले पछि नेकपा विभाजन हुँदापनि आफू कतैपनि नलागेको गौतमको भनाई छ । उनले आफू अझैपनि दुई दलबीच एकता गराउने प्रयासमा रहेको सुनाए ।

गौतमले अहिले आफू र ओलीबीच पानी बाराबारको अवस्था भने नरहेको स्पष्ट पारे । उनले ओलीले बोलाउँदा आफू जाने तर पार्टीमा प्रवेश गर्न भने नजाने विश्वास दिलाए । उनले अहिले आफू र माधव नेपाल नेतृत्वको नेकपा (एकीकृत समाजवादी) सँग एकताको लागि वार्ता तथा छलफल भैराखेको जानकारी दिए ।