नेकपा (माओवादी केन्द्र) का नेता एवं वरिष्ठ अधिवक्ता रामनारायण बिडारीले पूर्वराजा ज्ञानेन्द्र शाहले बढ्ता बोल्न थालेको टिप्पणी गरेका छन् । आज (सोमबार) नेपाली रेडियो नेटवर्कको नेपाली बहसमा पत्रकार ऋषि धमलासँग संवाद गर्दै उनले पूर्वराजा ज्ञानेन्द्रलाई दशा लागेको हुनसक्ने बताए । उनले भने,‘राजाले अलि बढ्ता बोल्न थालेका छन् । उनलाई दशा लागेको हो कि, के भएको हो ? त्यो त उनी जान्लान् । अलि बढ्ता बोल्न थालेका छन् ।’

साथै, उनले पूर्वराजालाई डाकाको संज्ञा दिए । नेता बिडारीले डाकाले सानातिना चोरहरुको विरोध गर्नुको अर्थ नहुने बताए । उनले भ्रष्टाचारको बिगबिगी रहेको र यसलाई नियन्त्रण गर्नुपर्छ भन्नेमा सबैको ध्यान जान जरुरी रहेको बताए । उनले राजतन्त्रलाई निकृष्ट, निर्दलीय, निरङ्कुश, अपराधीहरुको व्यवस्थाको संज्ञा दिए ।

‘नेताहरु सुध्रिनुबाहेक अरु उपाय छैन । निकृष्ट, निर्दलीय, निरङ्कुश, अपराधीहरुले सरकार व्यवस्था चलाएर बसेकाहरुले लोकतन्त्रमा भएका केही खराबीको विरोध गर्नुको कुनै तुक हुँदैन । अहिले उनी र म बराबर हो । उनलाई पैसा बढ्ता छ । किनभने शोषण, दमन गरेर कमाएको पैसा उनीसँग बढी छ । उद्योग छ, उनी धनाड्य छन् । तर, अधिकार र व्यक्तिगत स्वतन्त्रताको कुरामा अरु जनता सरह नै छन्,’– उनले भने ।