नेपाली कांग्रेसका सह–महामन्त्री जीवन परियारले प्रभु साहले संसद्मा मर्यदापूर्वक प्रश्न नसोधको टिप्पणी गरेका छन् । आज (सोमबार) नेपाली रेडियो नेटवर्कको नेपाली बहसमा पत्रकार ऋषि धमलासँग संवाद गर्दै उनले संसद्को मर्यादालाई ख्याल राखेर प्रधानमनत्रीलाई प्रश्न सोधिनुपर्ने बताएका हुन् । प्रश्न सोध्नेले पनि मर्यादाको ख्याल नगरेको र प्रधानमन्त्रीले पनि जवाफ दिएर ठीक नगरेको नेता परियारको भनाइ छ । हिजोको घटनाले समाजमा राम्रो सन्देश नगएको उनले बताए ।
‘प्रश्न पनि कस्ता सोध्ने, कतिवटा सोध्ने भन्ने कुरा नियमावलीमा छ । प्रश्नहरु पनि हामीले सोध्दा मर्यादापूर्वक सोध्दा राम्रो हुन्छ भन्ने हो । त्यही कुरालाई प्रस्तुत गर्ने शैली पनि फरक हुन्छ । कतिपय प्रश्नहरु प्रश्न हो कि होईन भन्ने खालका पनि थिए । हामीले यसलाई मर्यादापूर्वक संसद्को मर्यादालाई ख्याल गरेर प्रधानमन्त्रीलाई सोध्ने प्रश्न कस्तो खालको हुँदा उपयुक्त हुन्छ भन्ने कुरालाई पनि हामीले ध्यान दिनुपर्छ । हिजो जे भएको छ, त्यसले राम्रो सन्देश चाहीँ दिएको छैन,’– उनले भने ।