नेपाल कम्युनिष्ट पार्टीका महासचिव एवं समाजवादी मोर्चाका संयोजक नेत्रविक्रम चन्द ‘विप्लव’ ले आफूको गन्तब्य संघीय लोकतान्त्रिक गणतन्त्रमात्रै नभएर साम्यवाद भएको बताएका छन् ।

आज (सोमबार) सहिद सप्ताहअन्तर्गत सहिद प्रतिष्ठान नेपालको आयोजनामा ‘शान्ति प्रक्रिया, संघीय लोकतान्त्रि गणतन्त्र र आजको राजनीति’ विषयक कार्यक्रमलाई सम्बोधन गर्दै उनले आफूहरुको लक्ष्य र सपना वैज्ञानिक समाजवाद हुँदै मानव जातिलाई वर्गविहीन, शोषणविहीन, देशविहीन साम्यवादमा पुर्याउने रहेको बताए ।

साथै, माओवादी शान्तसँग बस्न नसक्ने शक्ति भएको बताए । उनले आफूले माओवादी केन्द्रका अध्यक्षसमेत रहेका प्रधानमन्त्री पुष्पकमल दाहाल ‘प्रचण्ड’ लाई उथलपुथल ल्याउन सुझाव दिएको बताए । ‘माओवादी शान्त ढङ्गले बस्न नसक्ने शक्ति हो । आज यहाँ प्रचण्ड कमरेड पनि आउनु भएको छ । मैले त चलाउनुस् भन्ने सुझाव पहिलेदेखि कै हो । उथलपुथल पार्नपर्छ क्या,’– उनले भने ।

साथै, जनताहरु चिच्याइरहेको, युवाहरु छट्पटाइरहेको, श्रमिक समुदायहरु अन्योलमा परेको र देशभक्तहरु छट्पटाइरहेको भन्दै उनले माओवादी क्रान्तिकारीहरु चुप लागेर बस्न नसक्ने बताए । देशमा जनतालाई दुःख परेको बेला बलिदानी दिन सक्ने शक्ति कम्युनिष्टहरुसँग मात्रै रहेको बताए । उनले आफूहरुलाई रुढीवाद र पछ्यौटेपन स्वीकार्य नहुने बताए ।