काठमाडौं । नेकपा एमालेका अध्यक्ष केपी शर्मा ओलीले वर्तमान सत्ता गठबन्धन भत्काउन प्रयास गर्ने घोषणा गरेका छन् ।

बिहीबार पार्टीको खेलकुद संगठन खेलकुद महासंघको कार्यक्रममा उनले मिसन ८४ को पर्खिन नसक्ने अवस्था आउने र गठबन्धन भत्काएर सरकार ढाल्न कोशिस गर्ने बताएका हुन् । सरकार निकम्मा, भ्रष्टाचार, तस्कर र कमिसनखोरको संरक्षक भएकाले देश बर्बाद हुनबाट जोगाउन गठबन्धन भत्काउने पहल गर्नुपर्ने उनले बताए ।

‘यस स्थितिमा हामीले मिसन ०८४ पर्खिन नसक्ने पनि अवस्था आउन सक्छ । देश बर्बाद भयो भने मिसन ०८४, ८४ को चुनाव भनेर पर्खिएर हुँदैन। उस्तै पर्यो भने हामीले यो गठबन्धन भत्काएर। यतापट्टि यो लोभिपापी नभत्किनसक्छन्।’ उनले भने ।
अध्यक्ष ओलीले वर्तमा सत्ता गठबन्धन नेताहरु घाँटीमात्रै नजोडिएको भन्दै शरीर पनि जोडिएको बताए।एमाले अध्यक्ष ओलीले अहिलेको गठबन्धन लोभीपापीहरुको मिलेमतो भएकाले यसलाई भत्काउन गाह्रो हुने भन्दै आन्दोलनबाट सरकार हटाउन प्रयास गर्ने आशय व्यक्त गरे ।

‘जनताको बलमा आन्दोलनमा उत्रिन पर्ने, देश बर्बाद हुन बाट जोगाउनुपर्ने हुन सक्छ’ उनले भने पार्टीले सिठी बजाउँदा आन्दोलनमा पुग्ने गरी तयार हुन कार्यकर्ताहरुलाई निर्देशन दिए । ‘छोटो, ३ दिनको तयारीमा हामी राष्ट्रिय आन्दोलनमा उत्रिन पर्ने हुन सक्छ । उनीहरुले हामीमाथि जस्तोसुकै प्रहार गर्न सक्छन्’, ओलीले भने ।

अहिलेको गठबन्धन देशका लागि हानिकारक रहेको भन्दै उनले समय घर्किनुअघि नै निर्णायक कदम चाल्नुपर्ने बताए । अध्यक्ष ओलीले वर्तमान सरकार भ्रष्टाचारी र भ्रष्टाचारीहरुको संरक्षणमा लागेको आरोप लगाए।

उनले भने, ‘सरकार कस्तो छ भने तरकारी बारीको बुख्याचा जस्तो छ। केही गर्ने होइन त्यसले। त्यसको टाउकोमा काग पनि बस्छ, सुँगा पनि बस्छ। सबै बस्छ। किनभने चिनिसके यो बुख्याचा हो भनेर। यो खासै केही होइन, कही गर्न सक्दैन्न भन्ने चिनिसके। त्यस्तो बुख्याचा, निकम्मा सरकार छ।’