काठमाडौं । राष्ट्रिय फुटबल टोलीका गोलकिपर विशाल श्रेष्ठले अन्तर्राष्ट्रिय फुटबलबाट सन्यासको घोषणा गरेका छन् ।

लामो समय राष्ट्रिय टोलीबाट मौका नपाउँदा पनि परिवार, साथीभाई शुभचिन्तकहरुको साथका कारण धैर्य भएर मनोबल बढाएको उनले बताए ।  किरण चेम्जोङ, रितेश थापा,विकास मल्ल टोलीमा रहेका बेला चौथो किपरको रुपमा तत्कालीन प्रशिक्षक ग्राहम रोबर्टसले मौका दिएका थिए । तर डेब्यूका लागि दश वर्ष प्रतीक्षा गर्नुपरेपनि विशाललाई त्यसमा खासै गुनासो छैन । ‘धेरै कुनुपर्यो । तर पनि २०२१ को सेप्टेम्बरमा यहि मैदानमा डेब्यूको मौका पाएँ । त्यो मेरो लागि अविष्मरणीय दिन थियो,’ थियो ।’ शुक्रबार म्यान अफ दी म्याच घोषित विशालले भने, ‘आफूले खेल्ने अवसर नपाउँदा पनि मैले आफूलाई अलग सोच्नु परेन । सिनियर र समकालिन साथीहरुको सधै साथ पाएँ। म यति बेला सबैलाई धन्यवाद दिन चहान्छु ।’

सन् २०११ मा पहिलो पटक राष्ट्रिय टोलीमा प्रवेश पाएका विशालले २०२१ सेप्टेम्बर ५ मा दशरथ रंगशालामा भारतविरुद्ध परिवर्तित खेलाडीका रुपमा डेब्यूको अवसर पाएका थिए ।  उनी राष्ट्रिय खेल जीवनको अधिकांश समय किरणको छायाँमा परे ।

राष्ट्रिय टोलीबाट धेरै मौका नपाएका विशाल घरेलु फुटबलका सफल गोलकिपरमा पर्छन् । मनाङ मस्र्याङ्दी क्लबबाट ए डिभिजन लिग जितेका उनी मछिन्द्र क्लबबाट दुई पटक च्याम्पियन बने । विशालकाे एक शालीन र अनुशासित खेलाडीको परिचय छ।