काठमाडौं ।  नेकपा एमालेका अध्यक्ष केपी शर्मा ओलीले गणतन्त्रभन्दा राजतन्त्र ठीक भन्दै देशलाई प्रतिगमनतिर लैजान खोज्नेहरु देशद्रोही भएको टिप्पणी गरेका छन् ।

एमालेले सञ्चालन गरेको ‘झुलाघाट चिवाभन्ज्याङ, समृद्धिका लागि संकल्प यात्रा’ को चौथो दिन दैलेखमा आयोजित सभालाई सम्बोधन गर्दै उनले राजवादीहरुमाथि हमला गरेका हुन ।  उनले अनेकथरी तत्वहरूले अहिलेको लोकतन्त्रभन्दा पञ्चायत नै ठीक भन्दै भ्रम छरेको बताए ।
ओलीले लोकतान्त्रिक गणतन्त्रभन्दा राजतन्त्रलाई उत्तम ठान्ने, पछिल्लो राजनीतिक परिवर्तनलाई उपलब्धि नठान्ने तत्त्व, जनताको हित नचाहने देशद्रोही भएको बताए ।

‘कोही प्रतिगमनतिर फर्किने कुरा गर्दैछ भने त्यो देशद्रोही हो, त्यो लोकतन्त्रविरोधी हो । त्यो जनतालाई सधैं गरिब राख्न खोज्ने कुरा हो ।’ ओलीले भने, आज लोकतान्त्रिक गणतन्त्रको कसैले विरोध गर्छ भने त्यो नेपाल र नेपालीको हितविपरीत सोचिरहेको छ ।’

उनले अहिलेको गठबन्धन सरकारको कारणले देश विकासमा गति लिन नसकेको दाबी गरे । एमालेलाई सरकारबाट हटाएको डेढ वर्षमा राजनीतिक अस्थिरता छाएको उनको भनाइ छ ।एमाले सरकारमा हुँदा गरिबी कम भएको र रोजगारी बढेको उनले जिकिर गरे । गठबन्धनका कारण देशको विकास रोकिँदा केही व्यक्तिहरुले पञ्चायत नै ठीक थियो भन्ने गरेको ओलीको भनाइ थियो ।

उनले एमालेका बारेमा विभिन्न भ्रमहरु फैलाएको हुनसक्ने हुँदा यी कुराहरुमा होस पुर्याउन आग्रह गरे ।अध्यक्ष ओेलीले भने, ‘एमालेले सरकार छाड्नेबित्तिकै देशमा राजनीतिक अस्थिरता छायो अहिलेको गठबन्धनको सरकारले गर्दा देशमा गरिबी र महँगी बढ्नुका साथै देश विकासमा पनि ढिलाइ भयो ।’