पोखरा । केपी ओली कप टी–२० राष्ट्रिय क्रिकेट प्रतियोगिताको उपाधि मधेश प्रदेशले जितेको छ । फाईनलमा त्रिभुवन आर्मी क्लबलाई ११ रनले हराउँदै मधेशले उपाधि जितेको हो । विभागीय टिमको बर्चश्व तोड्दै मधेशले ठूलो प्रतियोगिताको उपाधि जितेको छ ।

उपाधिसँगै मधेशले पाँच लाख रुपैयाँ नगद पाएको छ । आर्मीले २ लाख ५० हजारमामा चित्त बुझायो ।पोखरा रंगशालामा मधेशले दिएको १ सय ३६ रनको लक्ष्य पछ्याएको आर्मीले निर्धारित २० ओभरमा ८ विकेट गुमाउँदै १ सय २४ मात्र बनाउन सक्यो । सोमपाल कामी १६ र विवेक यादव नटआउट २५ रन बनाए पनि आर्मीलाई जिताउन सकेनन् ।

आर्मीलाई अन्तिम ओभरमा जितका लागि २४ रन चाहिएको थियो । तर उसले १२ रन मात्रै बनाउन सक्यो । अन्तिम ओभरको पहिलो बलमा विवेक यादवले ४ र दोस्रो बलमा छक्का हानेर आशा जगाएका थिए, तर तेस्रो बलमा उनले एक मात्रै रन लिन सके भने चौथो बल सोमपाल कामीले डट खेले । त्यसपछि पाँचौ बलमा एक रन लियो भने अन्तिम बल आर्मीले डट खेल्यो ।
आर्मीका कप्तान विनोद भण्डारीले ३२, सन्तोष कार्कीले १६, रोहित पौडेलले ५, राजेश बुढामगरले ३, बसिर अहमदले २, भीम सार्कीले २२ रन बनाएर आउट भए ।बलिङतर्फ मधेसका कप्तान हरिशंकर शाहले सर्वाधिक ४ विकेट लिए । ४ ओभर बलिङ गरेका शाहले १९ रन खर्चेर ४ विकेट लिएका हुन् । प्रदीप पासवान २ र प्रतीक यादव १ विकेट लिए ।यसअघि पोखरा रंगशालास्थित क्रीकेट मैदानमा टस जितेर पहिला ब्याटिङ गरेको मधेसले निर्धारित २० ओभरमा ८ विकेट गुमाउँदै १ सय ३५ रन बनाएको थियो ।

मधेसका विशाल पटेलले ४९, कप्तान हरिशंकर शाहले २७, अनिल शाह ६, इम्रान शेखले ८, पवन सराफले ९, हिमान्सु दत्तले १४, विशाल सुस्लिङले १०, प्रदीप पासवानले ४, मायन यादवले ३ रन बनाएका थिए ।बलिङतर्फ आर्मीका साहब आलम र विवेक यादवले सर्वाधिक ३–३, सोमपाल कामी र बसिर अहमदले १–१ विकेट लिए ।