विराटनगर । नेकपा माओवादी केन्द्रले कोशी प्रदेश सरकारबाट नेकपा एमालेलाई बाहिर धकेल्ने प्रयास शुरु गरेको छ । मुख्यमन्त्री केदार कार्कीले एमालेको साथसहित विश्वासको मत पाए लगत्तै माओवादीले यस्तो गतिविधि थालेको हो । माओवादीका कोशी प्रदेशसभा संसदीय दलका नेता इन्द्रबहादुर आङ्बोले कोशी सरकारबाट एमाले चाँडै बाहिरिनुपर्ने बताए ।

‘त्यसैले एमाले चाँडो भन्दा चाँडो सरकारबाट बाहिरिएर आफ्नो नैतिकता प्रदर्शन गरोस्’, उनले भने । मुख्यमन्त्री केदार कार्की कांग्रेस सांसद भएर पनि गठबन्धनको भावना आत्मसात नगरेको भन्दै उनले आफूहरुले गठबन्धनको भावना अनुसार विश्वासको मत दिएको बताए ।
माओवादी केन्द्र एमाले नेतृत्वको सरकारमा रहँदा अहिलेका मुख्यमन्त्री कार्कीले सत्ता गठबन्धनको भावना अनुसार सरकारबाट बाहिरिन आफूहरुलाई आग्रह गरेको नेता आङ्बोले स्मरण गरे । कांग्रेसका आठ जना सांसदसहित एमालेको साथ लिएर केदार कार्की मुख्यमन्त्री नियुक्त भएका थिए । र, सत्तागठबन्धनले एमालेलाई बाहिर  पठाउने गतिविधि थालेको छ ।