काठमाडौं । नेकपा एमालेका अध्यक्ष केपी शर्मा ओलीले नेपाली कांग्रेससँग मिलेर नयाँ सरकार बनाउन चाहेको सन्देश दिएका छन् । शुक्रबार बिराटनगरमा विमानस्थलमा सञ्चारकर्मीहरुसँग कुरा गर्दै ओलीले पुष्पकमल दाहाल प्रचण्ड नेतृत्वको सरकार हटाउनै पर्ने बताए ।

यो सरकार रहनु देशका लागि दुर्भाग्य भए पनि कांग्रेसका कारण विकल्प खोज्न नसकिएको बताए । कांग्रेस कुन संसारमा छ भन्ने थाहा नभएका कारण विकल्प नदेखिएको उनको भनाई छ ।
प्रमुख पार्टीहरु जिम्मेवार हुँदा अर्को विकल्प हुने भएपनि कांग्रेसले यसबारे नसोचेको उनले बताए । एमाले अध्यक्ष ओलीले भने, ‘कांग्रेस कुन संसारमा छ भन्ने नै थाहा छैन । देशको अवस्थाप्रतिको गम्भीरता केही देखिन्न ।’

‘यो सरकार रहनु देशका लागि दुर्भाग्य हो ।’  सरकार अपराधीको संरक्षकको रुपमा देखिएको भन्दै उनले भने,  ‘हामी आफैं जान चाहिरहेका छैनौं । यो सरकार हटाउने हो भने अर्को उपयुक्त विकल्प हुने स्थिति देखिनँ ।’