काठमाडौं । राष्ट्रिय स्वतन्त्र पार्टीका सभापति रवि लामिछानेले आफ्नो निर्वाचन क्षेत्र चितवन २ लाई लक्षित गरी विभिन्न कार्यक्रम शुरु गरेका छन् ।
संघीय सांसद बनेको १०० दिन पुरा भएको अवसरमा उनले आज आफ्नो निर्वाचन क्षेत्र लक्षित योजनाहरु सार्वजनिक गर्दै थालनी गरेका हुन् । योजना अन्तर्गत उनको निर्वाचन क्षेत्रमा ब्लु बससेवा संचालन देखि मोवाइल क्लिनिक संचालनसम्म छन् । सार्वजनिक कार्यक्रमहरु आजैदेखि सुरु भएको उनले जानकारी दिएका छन् । उनले यी कार्यक्रमहरु राज्यको खर्चमा नभई विदेशी दाता, निजी क्षेत्र र आम नागरिकको सहयोगमा सुरू गरिएको बताए ।

ब्लु बस सेवा
यो चितवन निर्वाचन क्षेत्र नम्बर २ का महिलाहरुका लागि मात्र संचालनमा ल्याइएको बस सेवा हो । यो ब्लु बससेवा चितवन २ नम्बर क्षेत्रका विभिन्न रुटमा आजैदेखि संचालनमा आएको छ । यो बस चढन शुरुमा यस निर्वाचन क्षेत्रका ५०० महिलालाई कार्ड वितरण गरिने छ । त्यो कार्डको प्रयोग गरेर महिलाले सुरक्षित बसस सेवा लिन पाउने छन् । सुरुमा एउटा बस मात्र संचालन ल्याइएपनि भविश्यमा यसलाई बढाउँदै लैजाने लामिछानेको योजना छ ।

मोवाइल क्लिनिक

यो सेवा पनि चितवन क्षेत्र नम्वर २ का ६५ बर्ष माथिका बृद्ध बृद्धाका लागि संचालनमा ल्याइएको हो । यो सेवा अन्तर्गत मोवाइल भ्यानमा एकजना एमबीबीएस डाक्टर र सहयोगीहरु प्राथामिक उपचारका लागि घर घरमा पुग्नेछन । बृद्धा बृद्धलाई नियमित स्वास्थ्य परिक्षण सेवा दिने छन् । यो मोवाइल क्लिनिक बोलाएमा जतिबेला पनि घरमै पुग्ने छ ।

सय दिनमा सय रोजगारी

उनको अर्को योजना छ, विदेशबाट नेपालीलाई घर फर्काउने । विदेशमा रहेका नेपाली स्वदेश फर्काउन १०० जनाका लागि रोजगारीका अवसर खोजेर निवेदन माग गरिएको छ । यसको विज्ञापन गरिएको लामिछानेले बताएका छन् जसमा दिएको योग्यता पुगे जो सुकै पनि नेपाल फर्कन चाहनेले निवेदन दिन सक्नेछन् । विज्ञापनमा १५ हजार देखि ढेडलाख सम्म तलव सुविधा दिने प्रष्ट पारिएको छ ।