नेकपा (एमाले) अध्यक्ष केपी शर्मा ओलीले सरकारले नक्कली ज्वाइँ खडा गरेर आफुलाई बद्नाम गराउन खोजेको बताएका छन्। झापाको भद्रपुर–१० चन्द्रगढीस्थित शहीद मनोज झपेन्द्र स्मृति सामुदायिक राष्ट्रसेवक भवनको उद्घाटन कार्यक्रममा उनले यस्तो बताएका हुन्।

‘अहिले संचारमाध्यम बोलाएर, फोटो खिच्न लाएर केपी ओलीको ज्वाइँ भन्न लगाइरहेका छन् । मेरा त छोरी देशभरी छन्, छोरीसँग बिहे गर्ने जति सबै ज्वाइँ हुने भए । छोरासँग बिहे गर्नेजति सबै बुहारी । यस्ता कुरा लिएर आफ्नो भ्रष्टाचार छोप्न खोज्ने छन् अहिले सरकारमा,’ अध्यक्ष ओलीले भने ।

नारायणहिटी संग्रहालयमा एउटा रेष्टुरेन्ट सन्चालन गर्ने ठेक्का पाएका बतास समूहका अध्यक्ष आनन्दराज बतास पछिल्लो समय विवादमा तानिएका छन् । यसअघि बतास समूहका प्रमुख आनन्दराज बतासले टिभी अन्तर्वार्तामा आफू शेरबहादुर देउवासँग नजिक भएपनि ओलीले ज्वाइँ भन्ने गरेको बताएका थिए ।