राष्ट्रिय प्रजातन्त्र पार्टी (राप्रपा) का अध्यक्ष राजेन्द्र लिङदेनको अध्यक्षतामा बसेको पदाधिकारी बैठकले गरेको निर्णयलाई निवर्तमान अध्यक्ष कमल थापाले चुनौती दिएका छन्।

राप्रपा काभ्रेका जिल्ला अध्यक्ष टुल्कु लामा, उपाध्यक्षद्वय श्रीदास लामा र गंगामाया लामा तथा सचिव धनजित लामालाई कारबाही गर्ने पदाधिकारी बैठकको निर्णय अवैधानिक रहेको थापाले जनाएका छन्।

राप्रपा महामन्त्री भुवन पाठकका अनुसार १४ पुसमा बसेको राप्रपाको काभ्रेपलाञ्चोक जिल्ला कार्यसमितिको विशेष बैठकले गरेको सिफारिशअनुसार, चारै जनालाई पार्टीको साधारण सदस्य समेत नरहने गरी निश्कासन गरिएको थियो।

पदाधिकारी बैठकको निर्णय पार्टी हितमा समेत नरहेको थापाको भनाइ छ। “राप्रपा काभ्रे जिल्ला अध्यक्ष टुल्कु लामा र गाउँपालिकाका दुई निर्वाचित वडाध्यक्षहरूलाई स्पष्टीकरण दिने अवसर नै नदिई पार्टीबाट निष्कासन गर्ने पदाधिकारी बैठकको निर्णय अवैधानिक र पार्टी हित विपरीत छ,” थापाले शनिबार सामाजिक सञ्जाल ट्विटरमा लेखेका छन्, “सो निर्णयप्रति खेद व्यक्त गर्दछु। पदाधिकारी बैठकलाई विधानले त्यस्तो अधिकार दिएको छैन।”

शुक्रबार बसेको राप्रपा पदाधिकारी बैठकले २७ पुसमा सार्वजनिक विदा घोषणा माग गरेर प्रधानमन्त्रीलाई ज्ञापनपत्र बुझाउने निर्णय समेत गरेको छ।