नागरिक उन्मुक्ति पार्टीकी अध्यक्ष तथा पूर्व मन्त्री रञ्जिता श्रेष्ठ नेकपा एमालेका अध्यक्ष केपी शर्मा ओलीलाई भेट्न पुगेकी छन् । रञ्जिताले आज दिउँसो ओली निवास बालकोटमा पुगेर भेटघाट गरेकी हुन् ।

सत्ता गठबन्धनमा सामेल हुने नहुने भन्नेबारेमा देखिएको विवादले उग्र रुप लिएपछि नागरिक उन्मुक्ति पार्टी (नाउपा)का शीर्ष नेताहरुले छलफललाई तीव्रता दिएका छन् ।

मंगलबार बिहान प्रधानमन्त्री पुष्पकमल दाहाल ‘प्रचण्ड’ ले श्रीमान(श्रीमतीबीचको विवादका कारण पार्टी विभाजन हुन नदिन र सत्ता गठबन्धन बलियो बनाइराख्न भन्दै नाउपाकी अध्यक्ष रञ्जिता श्रेष्ठ र संरक्षक रेशमलाल चौधरीसँग छुट्टाछुट्टै भेटवार्ता गरेका थिए ।

प्रधानमन्त्री कार्यालयमा भएको छलफलमा दुवैजनालाई मिलेर पार्टी एकता बचाइराख्न र प्रदेश तथा संघीय सरकारमा सहभागी हुन आग्रह गरेको बताइएको छ ।

रेशम चौधरी पनि ओलीलाई भेट्न बालकोट जाने तयारीमा रहेको बताइएको छ । उनी आजै साँझसम्म ओलीलाई भेट्न जाने कार्यक्रम रहेको बालकोट स्रोतले जनाएको छ ।

संघ र प्रदेश सरकारमा जाने नजाने भन्नेबारेमा नाउपामा रेशम र ञ्जिताबीच मतभेद देखिँदै आएको छ । रेशम र रञ्जिता श्रीमान श्रीमती हुन् । तर, पछिल्ला दिनमा व्यक्रिगत सम्बन्धलाई नै असर पर्नेगरि यी दुई दम्पत्ति एकअर्काविरुद्ध एक्सनमा उत्रिएका छ्न ।

दुवै जनाले आफ्नो अडान नछाडेपछि पार्टी र पारिवारिक जिवननै संकटमा परेपछि अ‍ोली र प्रचण्डले मिलाउने प्रयास थालेका हुन् ।