महाशिवरात्री पर्वको अवसरमा पाल्पाको तिनाउ गाउँपालिका वडा नम्बर ३ मा रहेको सिद्धबाबा मन्दिर विकास समितिले आयोजना गरेको खुल्ला भजन प्रतियोगितामा पाल्पाको राष्ट्रिय लोक भजन चुड्का सांस्कृतिक संस्था प्रथम भएको छ ।

प्रतियोगितामा सैनामैना रुपन्देहीको आरती भजन समूह द्वितीय भएको छ । यस्तै तृतीय सिद्धेश्वर शिवालय मन्दिर समूह र जनकल्याणकारी भजन समूह शुद्धोधन–२ हिरापुर तृतीय भएका छन् ।

सान्त्वना स्थानमा तिलोत्तमा भजन समूह तिनाउ ३ पाल्पा भएको छ । प्रतियोगितामा ११ समूहले भाग लिएका थिए । प्रतियोगितामा प्रथम स्थान प्राप्त गर्ने समूहले नगद १२ हजार, द्वितीयले ८ हजार, तृतीयले ४-४ हजार र सान्त्वना स्थान प्राप्न गर्ने समूहले २ हजार नगद पुरस्कार प्राप्त गरेका थिए । प्रतियोगितामा ८ वटा समूहले भाग लिएका थिए ।

प्रतियोगितामा लुम्बिनी प्रदेशका सभामुख तुलाराम घर्तीमगरले यस्तो प्रतियोगिताले नेपाली कला, संस्कृति, धर्मको रक्षा तथा पहिचानमा महत्वपूर्ण भूमिका खेल्ने बताएका थिए । उनले सिद्धबाबा मन्दिरको ऐतिहासिक महत्व रहेको भन्दै यसको प्रवद्र्धनको लागि प्रदेश सरकारले पूर्णरुपमा साथ र सहयोग प्रदान गर्ने बताएका थिए ।siddhababa temple.jpg

कार्यक्रममा मन्दिर विकास समितिका अध्यक्ष सन्तोष कुमार शेरचन, उपाध्यक्ष अमरसिंह प्रधान, कार्यक्रम संयोजक गोपाल प्रसाद बस्याल, सचिव अरबिन्द्र पाण्डे लगायतले आ आफ्नो भनाई राखेका थिए । कार्यक्रम संयोजक बस्यालका अनुसार पहिलो पटक आयोजना गरिएको प्रतियोगितालाई आगामी दिनमा समेत निरन्तरता दिने समितिका सदस्य तोया लम्सालले जानकारी दिए ।

प्रतियोगितामा ४० हजार भन्दा बढी श्रद्धालुहरुले मन्दिरमा पुजन गरेका छन् । मन्दिरमा भारतको गोरखपुर लगायतका स्थानबाट समेत श्रद्धालु भक्तजनहरु आएका थिए । मन्दिरमा यो बर्ष देखि भक्तालुहरुको लागि टोकन प्रणाली लागू गरिएको थियो । विहान ३ बजे देखि नै श्रद्धालुहरुले मन्दिरमा पुजाको लागि पुगेका थिए ।