काठमाडौँ । प्रमुख प्रतिपक्षी दल नेकपा एमालेले राष्ट्रियसभाको माघ ११ गते हुने निर्वाचनमा २० मध्ये ६ सिट मागेको छ । बिहीबार बिहान बालुवाटारमा बसेको सत्ता गठबन्धनको बैठकमा एमालेले ६ सिट मागेको प्रधानमन्त्री प्रचण्डले ब्रिफिङ गरेका हुन् ।

‘एमालेले राष्ट्रियसभाका ६ सिट मागेको छ ।’ प्रचण्डको भनाई उधृत् गर्दै एक नेताले भने, शान्ति प्रक्रिया टुंग्याउन एमालेलाई पनि सहमतिमै लिएर जाउँ भन्ने मेरो प्रयास हो, के गर्न सकिन्छ  ? ’

गठबन्धनले भने टीआरसीको विषय टुंगो लगाउनु पर्ने शर्त राखेको छ । आज कानून समितिको बैठकमा टीआरसी विधेयक टुंग्याउने सहमति बने एमालेलाई सीट दिन सकिने गठबन्धनको शर्त छ ।

एमालेले पहिला पनि संसदीय समितिमा आफुले भाग पाए टीआरसी विधेयक अघि बढाउने बताएर २ वटा समिति दिएपनि पछि बहानावाजी गरेको भन्दै शंका व्यक्त गरिएको छ ।  माधवकुमार नेपालले भने एमालेलाई सिट दिन अस्वीकार गरेका बताइएको छ ।