काठमाडौं । धरान उपमहानगरपालिकाका मेयर हर्क साम्पाङविरुद्ध दलहरु आन्दोलनमा उत्रिएका छन् । मेयर साम्पाङले आफ्नो कार्यकक्षबाट राष्ट्रपति र प्रधानमन्त्रीको तस्वीर हटाएको विरोधमा धरानका विभिन्न पाँच दलका भातृ संगठनहरू आन्दोलनमा उत्रिएका छन् ।

उनीहरुले राष्ट्रपति र प्रधानमन्त्रीको तस्बिर कार्यकक्षमा राख्ने प्रयास गरेका छन । तर दलका कार्यकर्ताहरू फोटो लिएर पुग्नु अघि नै धरान उपमहानगरको मूलगेटमा ठूलो संख्यामा सुरक्षाकर्मी तैनाथ गरिएको थियो । जसले तनाव समेत उत्पन्न भयो । आन्दोलित राजनीतिक दल र मेयर साम्पाङबीच कार्यालयमा कसको तस्वीर राख्ने भन्ने विषयमा सहमति खोज्न वार्तासमेत भएको छ । तर, वार्ता निष्कर्षमा पुग्न सकेन ।

दलहरु भने तीन दिनभित्र कार्यालयमा राष्ट्रपति र प्रधानमन्त्रीको तस्वीर राख्न अल्टिमेटम दिएर फर्किएका छन् ।मेयर साम्पाङले केही दिनअघि आफ्नो कार्यकक्षबाट राष्ट्रपति रामचन्द्र पौडेल र प्रधानमन्त्री पुष्पकमल दाहाल ‘प्रचण्ड’को तस्वीर हटाएर किराती राजा यलम्बरको राखेका थिए।दलहरुले अहिले फेरि यलम्बरको तस्वीर हटाएर राष्ट्रपति र प्रधानमन्त्रीकै राख्न खोजेका हुन् ।