काठमाडौं । के काठमाडौंका मेयर बालेन शाह र धरानका मेयर हर्क साम्पाङ  मिलेर नयाँ दल खोल्दैछ्न ?  दुई मेयरको भेटघाटपछि देशमा फेरि नयाँ दल खुल्न लागेको चर्चा परिचर्चा शुरु हुन थालेको छ । र, यसको ‘ग्राउण्ड’ दिएका छन, धरान उपमहानगरपालिकाका मेयर हर्क साम्पाङले । किनकी काठमाडौँ महानगरपालिकाका मेयर बालेन शाहसितको भेटपछि उनले सामाजिक सञ्जालमा जे जसरी विचारहरु व्यक्त गरेका छन, त्यसले प्रष्ट त्यसको संकेत गर्छ र अनुमानलाई बल दिन्छ ।

यस्तैमा शुक्रबार सामाजिक सञ्जालमा  साम्पाङले अब दल खोलेर अघि बढ्न लागेकोबारे थप संकेत गरेका छन् । ‘यदि हाम्ले राजनीतिक दल खोलेर अघि बढ्न चाह्यौँ भने को कसले साथ दिनु हुन्छ ? ’, साम्पाङको प्रश्न छ ।

देशका बेकामे कानुन बदल्न र देशद्रोह, भ्रष्टाचार रोक्न र बेथिति हटाउन नयाँ पार्टीको चाहिने उनको भनाइ छ । उनले सामाजिक सञ्जालमार्फत भनेका छन्, ‘भ्रष्टाचारी र बेकामेहरुलाई मेरा श्रम गर्ने पौरखी हात जोडेर नमस्कार नगर्ने निर्णय गर्दैछु म अब । मेरो साथमा को को हुनुहुन्छ ? ’
त्यति मात्रै होईन, उनले फेसबुकमा लेखेका छन, हतार नगर्नु नयाँ शक्ति निर्माण हुनेछ ।’

देशमा ‘परिवर्तन’ ल्याउने दाबीका साथ नयाँ दलहरु खुल्ने क्रम जारी छ । र, नयाँ पार्टीका रुपमा राष्ट्रिय स्वतन्त्र पार्टी पनि सशक्त ढंगले अघि बढिरहेको छ । यही मेसोमा बालेन र हर्कका तर्फबाट यस्तो कुरा आएको छ, जसले राजनीतिमा नयाँ तरंग उत्पन्न गर्न सक्छ  र त्यो चासोको विषय बनेको छ ।