काठमाडौं । नेकपा एमालेका अध्यक्ष केपी शर्मा ओलीले नेपाल स्वतन्त्र र सार्वभौमसत्ता सम्पन्न राष्ट्र भएपनि आफ्नो स्वतन्त्रता प्रयोग गर्न नसकेको टिप्पणी गरेका छन् ।  मध्यपहाडी लोकमार्ग केन्द्रित ‘झुलाघाट–चिवाभञ्ज्याङ संकल्प यात्रा’ का क्रममा शनिवार गोरखामा आयोजित अन्तरक्रियामा पूर्वप्रधानमन्त्री ओलीले यस्तो गम्भिर टिप्पणी गरेका हुन् ।

भारतकै कारण पोखरा र लुम्बिनीको एयरपोर्टबाट अन्तर्राष्ट्रिय उडान गर्न सरकार डराएको उनले बताए । यसमा भारतीय हस्तक्षेप भएको उनले बताए ।
पोखरामा बनेको एयरपोर्टबाट अन्तर्राष्ट्रिय उडान गर्न सरकार आफैं डराएको उनले दाबी गरे । ‘त्यो एयरपोर्ट चल्न नदिएको पनि के भन्नु सरकारले चलाएको छैन, कसैले चल्न पाउँदैनस् भनेर भित्र भनेपनि बाहिर त भनेको छैन’, उनले भने,  ‘आफ्नो जमिनमा बनेको एयरपोर्ट, आफ्नै जमिनबाट उडाउने आफ्नै जमिनमा ल्याण्ड गर्ने हो तर सरकार कस्तो छ भने पोखरामा विमानस्थल उद्घाटन भएछ भन्यो भने ‘अँ पहिले बनाइहाले के गर्ने’ भन्छन्, ‘हामीले बनायौ अब प्लेन उडाउँछौ भन्ने हिम्मत राख्नुपर्‍यो नि ! ’

चीनलाई मात्र पर्यटक लिएर आउन आग्रह गर्ने हो भने करिव दश लाख पर्यटक आफ्नै बिमानमा राखेर सिधै पोखरा आउने उनले बताए । त्यस्तै लुम्विनी एयरपोर्टबाट अन्तर्राष्ट्रिय उडान भए बुद्ध धर्मालम्वीहरुको ओइरो लाग्ने उनले जानकारी दिए ।

राष्ट्रियताको मामिलामा हामी कमजोर हुन नहुने बताउँदै उनले लिम्पुयाधुरा, लिपुलेख र कालापानीका प्रश्न उच्च संवादहरुमा उठाउन नसके देशप्रति बेइमानी हुने बताए ।

ओलीले चीनसँग नजिक भएमा सबै मिलेर सरकारबाटै अप्ठ्यारो पार्ने प्रवृत्ति नेपालमा रहेको बताएका छन् । ‘उत्तरसँग नजिक भएर विकासका काम अघि बढायो भने, नेपालमा कहिलै नाकाबन्दी नहुने गरी चीनसँग यातायात र पारवहन सम्झौता गर्‍यो भने र देशमा सुशासन ल्यायो भने सरकारबाट सबै मिलेर अठ्याउँछन्’, उनले भने । भारत रिसाउने भन्दै चीनसँग सहयोग लिन डराउँदा नेपालमा धेरै विकासका कामहरु ठप्प भएको उनले दाबी गरे ।

नेपालको आर्थिक अवस्था सुधारका लागी चीनका राष्ट्रपतिले सहयोग गर्ने प्रतिवद्धता गरेपनि अन्य पार्टीका नेताहरु भारत रिसाउँछ भन्दै सहयोग लिन डराएको उनले बताए ।