नेकपा (एमाले) का नेता एवं प्रतिनिधि सभा सदस्य सूर्य थापाले प्रधानमन्त्री पुष्पकमल दाहाल ‘प्रचण्ड’ नेतृत्वको सरकार एक दिन पनि राख्न नहुने टिप्पणी गरेका छन् । हिजो प्राइम टाइम्स टेलिभिजनको जनता जान्न चाहन्छन् कार्यक्रममा पत्रकार ऋषि धमलासँग संवाद गर्दै उनले प्रचण्ड नेतृत्वको सरकार निकम्मा, नालायक, जनविरोधी, राष्ट्रविरोधी रहेकाले यो सरकार ढाल्न उपयुक्त हुने बताएका हुन् ।

‘यो सरकार एक दिन पनि राख्न नहुने हो । यत्तिको निकम्मा, नालायक, जनविरोधी, राष्ट्रविरोधी, कुनै सर्भिस डेलिभरी छैन । षड्यन्त्रण होईन, यो सरकार ढाल्नु एकदमै जायज हो,’– थापाले भने ।

प्रचण्ड नेतृत्वको सरकारले जनता र सुशासन र भ्रष्टाचार नियन्त्रणको पक्षमा कुनै पनि काम गर्न नसकेको उनको भनाई छ । प्रधानमन्त्री प्रचण्ड जुल्फी लर्काएर ऐना हेर्दै आफैं मख्ख परिरहेको टिप्पणी गर्दै उनले यो सरकारलाई महत्व दिन आवश्यक नरहेको बताए ।

‘उहाँ (प्रचण्ड) ले ऐना हेर्दै मख्ख पर्दै, जुल्फी लर्काउँदै, कपालमाथि फर्काउँदै, ऐना हेर्दै मख्ख पर्दै गर्नुभएको छ । त्यसको मैले महत्व दिनु ?’ उनले प्रश्न गरे ।

रुकुम पुगेर प्रधानमन्त्री प्रचण्डले सरकार पाँचै वर्ष टिकाउने दाबी गरेको सन्दर्भमा केन्द्रीत हुँदै उनले रुकुम, रोल्पाका सोझा जनतालाई फेरि झुक्काउने कोशिस भएको बताए । अहिले प्रचण्डको विजोग रहेको उनले बताए । दसैं तिहारपछि सरकार टिकाउन सकिँदैन भनेर प्रधानमन्त्री प्रचण्ड छट्पट्टीरहेको उनको टिप्पणी छ ।

‘उहाँले रोल्पा, रुकुममा ०५२ सालअघि जसरी सोझासिधा जनताको आँखामा फूलो पार्ने कोशिस गर्नुभयो, त्यही क्रममा अहिले पनि झुक्काउन सकिन्छ कि भनेर धक्कु लगाउनु भएको हो । उहाँको विजोग छ, अब दसैं तिहारपछि सरकार चल्दैन भन्ने लागेपछि उहाँ छट्पट्टिनु भएको छ । जब सरकार चल्दैन भनेर उहाँले अनुभूति गर्नुहुन्छ, तब पाँच वर्षै चलाउँछु भन्नुहुन्छ,’– उनले भने ।