क्यानबेरास्थित नेपाली राजदूतावासको फोन नउठेर हैरान भएका नेपालीहरुले अब राहतको शास फेर्न पाउने भएका छन । नेपाल सरकारले नभई एनआरएनए न्यु साउथवेल्सले एक जना फोन उठाउने कर्मचारी दूतावासमा राख्न पहल थालेसँगै फोन नउड्ने सास्तीबाट छुटकारा मिल्ने आशा गरिएको हो ।

एनआरएनए न्यु साउथवेल्स राज्य संयोजक बिनोद कुँबरले नेपाली राजदूतावासबाट आउने गुनासो सम्बोधनका लागि आफूहरुले कर्मचारी व्यवस्था गरेर सहयोग गर्न लागेको जानकारी दिनुभयो । पहिला तीन महिनाका लागि करारमा राखिने कर्मचारीको काम फोन उठाउने, राहदानीसम्बन्धी जानकारि उपलब्ध गराउने हुनेछ । नेपाल सरकारले कर्मचारी नपठाएको खण्डमा तीनमहिने करार थपेर २ वर्षसम्म लम्ब्याउने सकिने समेत एनआरएनए न्यु साउथ वेल्सले जनाएको छ । यी कर्मचारीको तलब सरकारी कोषबाट नभई एनआरएनए पदाधिकारीबाटै उपलब्ध गराइने बताइएको छ ।

क्यानबेरा आसपासमा फुल टाईम कामदारको खोजीमा रहेको र यस्तो काम गर्न योग्य नेपाली युवायुवती कोही हुनुहुन्छ भने एनआरएनए न्यु साउथवेल्स मार्फत दूतावासमा जोडिनसक्नुहुनेछ । एनआरएनए अभियन्ताहरुले दूतावासको समस्याको अस्थायी समाधान खोजेपनि पर्याप्त कर्मचारिको व्यवस्था गर्दै नेपाली समुदायलाई झञ्झटरहित सेवा दिन अहिलेदेखी नै गृहकार्य गर्नुपर्छ । नेपाली दूतावासको सेवामा बारम्बार प्रश्न उठ्ने होइन, वा क्या राम्रो भन्ने सुन्न र देख्न पाइयोस् ।