काठमाडौं । राष्ट्रिय स्वतन्त्र पार्टीका सभापति रवि लामिछानेले अपराधीहरुलाई आममाफी दिएको भन्दै राष्ट्रपति रामचन्द्र पौडेलको भूमिकामाथि प्रश्न उठाएका छन् । काभ्रेपलाञ्चोकको बनेपामा आयोजित पार्टीको कार्यक्रमलाई सम्बोधन गर्दै लामिछानले दलले पालेका गुण्डा र अपराधीलाई छाड्न हस्ताक्षर गरेर राष्ट्रपतिले नराम्रो काम गरेको टिप्पणी गरे ।
आफू राष्ट्रपति भएको भए दलले पालेका गुण्डा र अपराधीलाई छाड्न हस्ताक्षर नगर्ने पनि उनले बताए ।फेरि अरु अपराधी छुटाउने मौका कुरेर बस्ने काम भैरहेको भन्दै उनले आक्रोश व्यक्त गरे ।

‘फेरि अहिले अर्को अपराधी मुख मिठ्याएर बसेको छ मलाई चाहिँ नछुटाउने उसलाई चाहिँ छुटाउने भनेर मैले मात्रै अपराध गरेको छु र भनेर अर्को अपराधीको लाइन छ । राजनीतिक दल नै पिच्छे लाइन छ । पख्नुस् न संविधान र गणतन्त्र दिवस आउँछ नि भनेर । हाम्रो सरकार छ हाम्रै राष्ट्रपति हुनुहुन्छ भनेर विभिन्न जघन्य अपराध गरेको मान्छेहरुको लिष्ट ठूला पार्टीका नेताहरूले खल्तीमा हालेर बसेका छन् । तपाईंहरूले जति विरोध गर्नुस् त्यही सरकारमा लिएर जान्छन् र राष्ट्रपतिकहाँ चढाउँछन् ।’ उनले भने ।

उनले आफूहरूले कुनै दलको नभइ १० वर्ष कुनै राजनीतिक दलमा नलागेको व्यक्तिलाई राष्ट्रपति बनाउने परिकल्पना गरेको समेत बताए ।

‘हामीले परिकल्पना गरेका जस्ता व्यक्ति राष्ट्रपति भए भने दलले पालेका गुण्डा र अपराधीलाई छुटाउन हस्ताक्षर गर्दैनन् ।’ लामिछानेले भने, ‘हामीले हरेक काण्डमा बोलेका छौं। तर, हामीलाई जनताले बोलेर मात्रै के हुन्छ र भन्लान् ?  त्यसैले अब हामीले एकैचोटी त्यसको जवाफ ०८४ मा दिन्छौं ।’