काठमाडौं । पूर्वप्रधानमन्त्री डा.बाबुराम भट्टराईले नेकपा माओवादी केन्द्रका अध्यक्ष पुष्पकमल दाहाल प्रचण्ड नेतृत्वको वर्तमान सरकार विदेशीको आडमा टिकेको दाबी गरेका छन् ।

गौर हत्याकाण्डका पीडितसँग मंगलवार सरकारले सहमति गरेपछि बेलुकी सामाजिक सञ्जालमा त्यसबारे प्रतिक्रिया जनाउने क्रममा भट्टराईले प्रचण्ड सरकारको हैसियतमाथि प्रश्न उठाएका हुन् । प्रचण्डसँगै उनले सत्ता साझेदार दल जनता समाजवादी पार्टीका अध्यक्ष उपेन्द्र यादवको नामै नलिई उनको वर्ग पक्षधरतामाथि प्रश्न उठाएका छन् । गौर हत्याकाण्ड देशभित्र र बाहिरका वर्चश्वशाली शक्तिले सुनियोजित ढंगले मच्चाएको नृंशस आतंक र हत्याकाण्ड भएको उनको भनाई छ ।

‘स्मरण रहोस् यो विभत्स हत्याकाण्ड कुनै राज्यविरूद्धको विद्रोहको क्रममा घटेको र शान्तिप्रक्रियासंग जोडिएको घटना हैन ! यो त मधेशका उत्पीडित वर्ग र समुदायका निहत्था नागरिकहरूलाई मुक्तिआन्दोलनबाट विमुख पार्न देशभित्र र बाहिरका वर्चस्वशाली शक्तिहरूले सुनियोजित ढंगले मच्चाएको नृशंस आतंक र हत्याकाण्ड थियो।’ भट्टराईले भनेका छन,तिनै वर्चस्वशाली भित्री र बाहिरी शक्तिको टेकोपुॅडोमा अडेको यो सरकारको नेतृत्वले पीडितलाई न्याय दिने हिम्मत र हैसियत राख्ला ? भविष्यले बताउनेछ।’

२०६४ चैत ७ मा रौतहटको गौरमा उपेन्द्र यादव नेतृत्वको तत्कालीन मधेशी जनअधिकार फोरमका कार्यकर्ताले २७ जना माओवादी कार्यकर्ताको नृशंस ढंगले हत्या गरेका थिए र अहिले १७ वर्षपछि पीडितहरुले दोषीमाथि कारवाहीको माग गर्दै प्रदर्शन गरिरहेका थिए । मंगलवार सरकार र संघर्ष समितिबीच ५ बुँदे सम्झौतामा हस्ताक्षर भएको छ । तर पूर्व प्रधानमन्त्री बाबुराम भट्टराईले सरकारले फोस्रो आश्वासन दिएको भन्दै आपत्ति जनाएका छन् ।

‘गौर हत्याकाण्डको आन्तरिक र बाह्य जरो नखोतलीकन र सत्ताको अंकगणितभन्दा माथि नउठिकन यसवारे पीडित आन्दोलनकारीहरूलाई पटकपटक फोस्रा आश्वासन दिनुको कुनै अर्थ हुन्न। ’ भट्टराईले सरकारले सम्झौता गरेपछि प्रतिक्रिया जनाउँदै भनेका छन् । पूर्व प्रधानमन्त्री भट्टराईले गौर हत्याकाण्डबारे केही गर्न नसकेको आत्मालोचना गरेका छन् । उनी सामाजिक सञ्जालमा लेख्छनस् शान्तिप्रकृया र संविधान निर्माणको विशिष्ठ कालखण्डमा हामीले चाहेर पनि यसवारे केही गर्न नसकेकोमा आत्मालोचित छौं। सत्य र न्यायका पक्षधर शक्तिहरूको दबाब र खबरदारी जारी रहोस् ! सत्य र न्यायको जीत एक दिन अवस्य हुनेछ !’

अहिले उपेन्द्र यादवमाथि प्रश्न उठाएका भट्टराईले तिनै यादवसँग एकसमय मिलेर पार्टी चलाएका थिए ।

भट्टराईले सामाजिक सञ्जालमा लेखेको कुरा जस्ताको त्यस्तै:

गौर हत्याकाण्डको आन्तरिक र बाह्य जरो नखोतलीकन र सत्ताको अंकगणितभन्दा माथि नउठिकन यसवारे पीडित आन्दोलनकारीहरूलाई पटकपटक फोस्रा आश्वासन दिनुको कुनै अर्थ हुन्न।

स्मरण रहोस् यो विभत्स हत्याकाण्ड कुनै राज्यविरूद्धको विद्रोहको क्रममा घटेको र शान्तिप्रक्रियासंग जोडिएको घटना हैन ! यो त मधेशका उत्पीडित वर्ग र समुदायका निहत्था नागरिकहरूलाई मुक्तिआन्दोलनबाट विमुख पार्न देशभित्र र बाहिरका वर्चस्वशाली शक्तिहरूले सुनियोजित ढंगले मच्चाएको नृसंस आतंक र हत्याकाण्ड थियो।तिनै वर्चस्वशाली भित्री र बाहिरी शक्तिको टेकोपुॅडोमा अडेको यो सरकारको नेतृत्वले पीडितलाई न्याय दिने हिम्मत र हैसियत राख्ला? भविष्यले बताउनेछ।

शान्तिप्रकृया र संविधान निर्माणको विशिष्ठ कालखण्डमा हामीले चाहेर पनि यसवारे केही गर्न नसकेकोमा आत्मालोचित छौं।सत्य र न्यायका पक्षधर शक्तिहरूको दबाब र खबरदारी जारी रहोस्! सत्य र न्यायको जीत एक दिन अवस्य हुनेछ !