सत्तारुढ र प्रमुख प्रतिपक्षी लगायत दलले संसदीय समितिहरूको नेतृत्व चयन प्रक्रिया तत्काल अघि बढाउने प्रतिवद्धता जनाएका छन् । सभामुख देवराज घिमिरेले मंगलबार बोलाएको छलफलमा प्रमुख तीन दलका नेताहरुले अब सभापति चयन प्रक्रियामा ढिलो नगर्ने र काम अघि बढाउने सहमति गरेका हुन्

‘सभापति चयनबारे प्रक्रिया अघि बढाउनुपर्ने अवस्था आएको छ मैले सकेसम्म समझदारी होस् नभए अब प्रक्रिया अघि बढ्छ भनेको छुु ।’ बैठकपछि सभामुख घिमिरेले भने ।

बैठकपछि कानुन तथा संसदीय मामिलामन्त्री धनराज गुरुङले सभापति चयनबारे सबै दलका प्रमुख सचेतकहरुसँग छलफल गरेर चाँडै प्रक्रियाअघि बढाउने सहमति भएको जानकारी दिए । उनले सबै दलहरु संसद्‌मा मिलेको सन्देश दिन सभापति चयनमा विगतको सहमतिलाई कार्यान्वयनमा जोड दिने बताए । ‘पुरानो सहमतिअनुसार अघि बढ्न हामी तयार छौं । ’ मन्त्री गुरुङले भने ।

सभापति चयन नहुँदा संसदीय समितिहरुले काम गर्न नसकेपछि सभामुख घिमिरे दलहरुलाई दबाब दिन बैठक बोलाएका थिए । बैठकमा सभामुख घिमिरे संसदीय समितिको नेतृत्व चयनमा ‘तपाईंहरूबीच कुनै समझदारी हुन्छ कि निर्वाचन प्रक्रिया अघि बढाऊँ ?’ भन्दै शीर्ष नेताहरुलाई सोधेका थिए ।समितिको नेतृत्व नहुँदा ज्येष्ठ सदस्यबाट बैठक सञ्चालन भइरहेको छ । ज्येष्ठ सदस्यले नेतृत्व गर्दा विधेयकका छलफलहरु अगाडि बढ्न सकेका छैनन् ।