जर्ज फ्लोयडकी भाञ्जीकी छोरीमाथि सुतिरहेका बेला गोली प्रहार भएको छ । टेक्सास अपार्टमेन्टमा शनिबार सबेरै उनीमाथि नियोजित आक्रमण भएको हो ।

एरियाना डेलानेको अवस्था हाल खतरामुक्त छ तर हाउस्टनमा उनको शल्यक्रिया भएको छ र गोली लागेका कारण उनको कलेजो र फोक्सोमा चोट लागेको छ भने उनका तीनवटा करङछन् ।

हालसम्म प्रहरीले घटना गराउनुको उद्देश्यबारे जानकारी दिएको छैन न नै घटनामा कसको संलग्नता थियो भन्ने बारे कुनै खबर छ । तर परिवारका अन्य सदस्यले भने उक्त घटनामा संलग्न व्यक्ति को हो भन्ने थाहा भएको र उक्त घटना नियोजित नै भएको दाबी गरिरहेका छन् ।

शनिबार बिहानै ३ बजे जर्ज फ्लोयडको परिवार बसेको दोस्रो तलमा अन्धाधुन्ध गोली चलाइएको थियो ।

​घटनाका बेला उक्त फ्ल्याटमा ६ जनाको उपस्थिति थियो जसमध्ये चारजना वयस्क थिए भने दुईजना बालबालिका थिए । यी सबैजना सुतिरहेका थिए । एरियाना अघिल्लो बेडरुममा सुतिरहेकी थिइन् ।

‘मेरी छोरी उफ्रिइन् र भनिन्, ‘ड्याडी मलाई हानियो,’ उनका पिता डेरिक डेलानेले एबीसी१३ लाई भने ।

‘रगत देखेपछि म आत्तिएँ । त्यतिबेला थाहा पाएँ कि मेरी चार वर्षे छोरीलाई साँच्चिकै हानिएको रहेछ,’ डेलानेले सम्झिए । ‘उनलाई के भइरहेको थियो, केही थाहा भएन । उनी मस्त निद्रामा थिइन् ।’

डेलाने आफ्नी छोरीको डान्सर वा चियरलिडर बन्ने सपना पूरा हुने कुरामा अझै आशावादी छन् ।

‘मेरो घरमा किन आक्रमण गर्नुपर्यो ?’ डेलानेले प्रश्न सोधे । ‘मेरी छोरीलाई थाहा छैन । यो कुरा म उनलाई बताउन सक्दिनँ । एक पिताको रुपमा तपाईंले आफ्ना बालबच्चाको रक्षा गर्न सक्नुपर्छ ।’