सिड्नी । अस्ट्रेलियामा आजदेखि वसन्त ऋतु सुरु भएको छ। तर, यसपटकको वसन्तयाममा देशका अधिकांश क्षेत्रमा सामान्यभन्दा बढी गर्मी हुने मौसम पूर्वानुमान गरिएको छ।

मौसम पूर्वानुमान ब्युरो (BOM) का अनुसार सेप्टेम्बरदेखि नोभेम्बरसम्मको वसन्तयाममा अस्ट्रेलियाका अधिकांश क्षेत्रमा दिन र रात दुवैको तापक्रम औसतभन्दा माथि रहने सम्भावना छ। दक्षिणी तथा दक्षिणपूर्वी क्षेत्रमा अस्वाभाविक रूपमा उच्च तापक्रमको सम्भावना अझ बढी रहेको ब्युरोले जनाएको छ।

वसन्त ऋतुको सुरुवातमै दक्षिणपूर्वी अस्ट्रेलियामा उत्तरपश्चिमबाट तातो हावा प्रवेश गर्ने भएकाले तापक्रम सामान्यभन्दा करिब ५ डिग्री सेल्सियससम्म माथि पुग्ने अनुमान गरिएको छ। सिड्नीमा आगामी दिनमा तापक्रम २७ डिग्री सेल्सियससम्म पुग्ने पूर्वानुमान छ।

सिड्नीमा सेप्टेम्बरको सुरुवाती दिनमा २४ डिग्री सेल्सियसभन्दा माथि तापक्रम पुगेको पछिल्लो पटक सन् १९६९ मा भएको थियो। त्यसैले यस वर्षको वसन्त सुरुवात पछिल्लो पाँच दशकभन्दा बढी अवधिमै असामान्य रूपमा तातो हुने देखिएको छ।

BOM ले वसन्तयाममा तापक्रमसँगै केही क्षेत्रमा वर्षा औसतभन्दा कम हुने सम्भावना पनि औंल्याएको छ। विशेषगरी दक्षिण तथा पूर्वी अस्ट्रेलियाका केही भागमा सुख्खा अवस्था देखिन सक्ने र गर्मी बढेसँगै केही क्षेत्रमा डढेलोको जोखिमसमेत बढ्न सक्ने चेतावनी दिइएको छ।

यसैबीच, अस्ट्रेलियाले यसअघि नै असामान्य रूपमा तातो जाडो अनुभव गरिसकेको छ। त्यसको निरन्तरताका रूपमा वसन्तको सुरुवातमै देखिएको उच्च तापक्रमले आगामी महिनाहरूमा मौसम थप तातो हुन सक्ने संकेत गरेको छ।