समाजवादी मोर्चाको बैठकले पछिल्लो राजनीतिक परिस्थितिको विश्लेषण गर्न समीक्षा कार्यदल गठन गरेको छ । आज (मंगलबार) नेकपा (एकीकृत समाजवादी) को पार्टी कार्यालयमा बसेको बैठकले पछिल्लो राजनीतिक घटनाक्रमले मुलुकलाई पश्चगमनतिर धकेलेको निश्कर्ष निकाल्दै समीक्षाका लागि कार्यदल गठन गरेको हो । कार्यदलले समीक्षालाई दस्तावेजीकरण गरेर आगामी कार्यक्रम र योजनासहित तय गर्ने बताइएको छ । कार्यदललाई १५ दिनको समय सीमा दिइएको छ ।

बैठकमा माओवादी केन्द्रका अध्यक्ष तथा निवर्तमान प्रधानमन्त्री पुष्पकमल दाहाल प्रचण्ड, नेकपाका महासचिव नेत्रविक्रम चन्द ‘विप्लव’,प्रवक्ता खड्गबहादुर विश्वकर्मा ‘प्रकाण्ड’, नेपाल समाजवादी पार्टीका अध्यक्ष महिन्द्र राय यादव र सह–अध्यक्ष गंगानारायण श्रेष्ठ, नेकपा एकीकृत समाजवादीका अध्यक्ष माधवकुमार नेपाल, महासचिव घनश्याम भुसाल, प्रमेश हमाल र जीवनराम श्रेष्ठलगायत सहभागी थिए ।

बैठकको निर्णय सार्वजनिक गर्दै प्रकाण्डले भने, ‘नेपालको राष्ट्रिय राजनीतिका एउटा नयाँ घटना घटेको छ । यो लगायत देशको समग्र स्थितिको बारेमा र समाजवादी मोर्चाको विगतको काम कारबाहीको बारेमा गम्भीर समीक्षा भएको छ । यो घटनाले के देखाउँछ भने– प्रगतिशील यात्रातिर अगाडि बढिरहेको देशलाई यथास्थिति, पश्चगमन र विगतका आन्दोलन र उपलब्धीहरुलाई थ्रेट गर्नेतिर यसले उद्यत गर्न खोजेको देखिन्छ ।’

त्यस्तै, महेन्द्र राय यादव, गंगानारायण क्षेत्र लगायतको नेतृत्वमा रहेको नेपाल समाजवादी पार्टीलाई समाजवादी मोर्चामा समावेश गरिएको छ । अरु सबै प्रगतिशील र कम्युनिष्ट घटकहरुसँग छलफल चलाउने, मोहन विक्रम र उपेन्द्र यादवले नेतृत्व गरेको पार्टीलाई मोर्चामा ल्याउन पहल गरिने प्रकाण्डले बताए ।

साथै, प्राकृतिक विपत्तिमा परि निधन भएकाहरुप्रति समाजवादी मोर्चाले श्रद्धाञ्जली व्यक्त गरेको छ । पीडित परिवारलाई उचित राहत र बेपत्ताहरुको खोजी कार्यमा तीब्रता दिन मोर्चाले सरकारको ध्यानाकार्षण गराएको छ ।